Read Biete LAPUI 9 Bible Online

LAPUI 9 - Biete bible

LAPUI 9

¹Davida Inpâkna Lâ PUMAPA, ki lungril murdin nang inpâk ki ta; Ni sinrikhêl sin murdi inpuang ki ti.

²Nangma sikin lômin zâi ki ta; Tinrêngthothei Pathian, nangma riming inpâkin la sak ki ti.

³Nangmah ni zuang inlârin chu ke râlhei khom lâizâm an tho ngai a; Ni maah chu ilîrin an rimang ngai.

⁴Nang chu ni roirêlnaheiah ne dikin, ni fel a, Keima tiang ithlêkin ni rêl ngai.

⁵Pathian dik neiino namhei chu thiamno nen chang a, Mi siahei kha nen rimang ngai; Anni chu iremai ni khâi no nih.

⁶Kumkhuantluangka rangin kin irâlhei chu an rimang zoi tâk a; An khopuihei kha nangman ne sim tâk a, Ringil pharin an iom tâk a nit.

⁷Nikhomseh, PUMAPA chu kumtluang rêng a nit a; Roirêl rangin a rêngṭhungmun ân ding tâk.

⁸Felnan rammual pumpui a rêl a; Diknan nam tin chungah roi a rêl ngai.

⁹PUMAPA chu nuamlo tuanghei ranga ribîkna kulpui a nit a; Lungzîng lâia zôkna mun ihoi a nit.

¹⁰PUMAPA, nang irianfelhei kan, An iamna ni chungah ringat an ta; Tukhom ni zianga hong kangân chu lei heng ngai mak cheh.

¹¹PUMAPA, Ziona om chu inpâk unla, Nam tin lâiah a sinthohei inpuang rei.

¹²Pathianin dengthei ituanghei khah a riat mai a; An ṭap irî ringil ngai mak. Ani khan mi nunterhei chu deng ân thei ngai.

¹³O PUMAPA, lung nen kham inla; O PUMAPA, thina kotbâi ata nen zôk ngaitu, Ke râlhei sika ki dengthei tuang hi en roh.

¹⁴Khanchu, Jerusalem mihei makungah ngîr ki ta, Nang ken pâkna bihei hi an ziangah inpuang ki ta; Ni ne saninring tâk sikin lôm ki ti.

¹⁵Pathian dik neiino mihei chu an dîp choih ngêiah an tlâk a; An chângkam ngêiah khan an iôk zoi tâk.

¹⁶PUMAPA chu roirêl felnaheiah khan amah neh amah inlangin a om a, Mi siahei chu an sintho ngêiah khan an ripal ngai.

¹⁷Mi siahei mongna chu thina a nit; Pathian nungisongtuhei murdi khom.

¹⁸Ṭangpui ringaihei chu iensanin om mai no ni a; Inrianghei sabeina khom kumkhuakan nuaiisian om no nih.

¹⁹PUMAPA, tho zuang roh, Miriamhein nang ngaminseh no riseh. Nam tinhei khah ni maah hong bûm inla; An chungah roirêl pêk roh.

²⁰O PUMAPA, anni khah inṭin la; Anni chu â fam thei miriam pai an nit iti inreh roh.