Read Biete LAPUI 90 Bible Online

LAPUI 90 - Biete bible

LAPUI 90

¹Pathian mi Mosia ṭongṭaina O PUMAPA, nang chu suanpâr murdi tena kin omna ni nit ngai a.

²Itlânghei insiang ma a, Rinêng neh rammual nen ding ma khomah khan, Kumtluang ata kumkhuantluang khomin, Nang chu Pathian ni nit.

³Nangman chu miriam hih ipilah nen kîr nôk ngai a; “Miriam naihei o, kîr nôk ta rei,” ni ti ngai.

⁴Nangma ringaiin chu kum sângkah khom hi sûnka angkah a nit a; Mizân ithleng tâk angkah a nit a, Zân dârkâr itôite angkah a nit.

⁵Miriamhei chu tui ilian angkan ni fen pai a; Anni chu rimang angkah an nit a. Zînga loisûl hong icher rinoi suak angkah an nit.

⁶Zîngah chu a hong thuarin a hong indon suak a, Kholoiah chu a hong thêmin a hong ram ngai.

⁷Ni ningmurnaah khan inrimangin kin om a; Ni ningthikna sikin lunginzîngin kin om a.

⁸Kin sualnahei chu ni makungah ni sia a, Kin sual thuphei khom ni mêl vârah ni sia a.

⁹Kin dam sung sûnhei hi ni ningthiknaah a hek ngai a; Kin damlâi kumhei hi mit khapkâr kan a hong mong ngai.

¹⁰Kin dam sung sûnhei chu kum sômsarikah a nit a; Râtna sikin kum sômiriatkah khom a nit thei a; Nikhomsela, a sôtna chu lungzîngna neh ngaisiatna bang a nit; Ringna chu a hek zel a, Keini khom kin ivuangpai ngai a nit.

¹¹Tûm ni ningthik sinthotheizia hi â ngaitua a? Tûm ni ningthikna inrîtzia riaa nangma ṭi?

¹²Kin damlâi sûnhei tep dân nen risei inla, Vârna lungril kin nei theina rangin.

¹³O PUMAPA, zuang kîr nôk roh, Itena sôt im ni ningthikna ai om rang? Ni bôihei hi lung inkham inla, ne lung iṭhuai nôk roh.

¹⁴O, zîng tin ni lungkhamliannaah khan nen thlâi inla, Kin ring kong kârkah râifân takkan zâi tâng kin ti.

¹⁵Nangman deng ni nen thei sung sûnhei neh, Vânduai kin tong kum sung zoro dôrkah kha nen lôm roh.

¹⁶Ni sinthohei chu ni bôihei ziangah ilang sela; Ni roinpuina chu an naihei ziangah khom ilang riseh.

¹⁷PUMAPA kin Pathian ditsakna chu kin chungah om sela; Kin kut sinthohei hi ṭhatvur inla; A nit, kin kut sinthohei murdi hih ṭhatvur roh.