Read Biete LAPUI 91 Bible Online

LAPUI 91 - Biete bible

LAPUI 91

¹Chungnungtaka rithla nuaia om a, Tinrêngthotheitu dâilîma om maitu khan,

²PUMAPA ziangah, “Ki zôkna neh ki kulpui; Ki Pathian, ki iamna ringatna chu ni nit,” ti ngêt a ti.

³Ani khan châng idotu châng ata nang sanisuang a ta, Ripui inrît tak ata khan nang saninzôk a ti.

⁴Ni chungah arthla pharin nang rikhû a ta; Arthla nuaiah khan ribîng ni ta; A thutak khan nang irungin, nang inzôk a ti.

⁵Zânah thil inrît chu ṭi no tin a, Sûnah thal ilênghei khom ṭi ual no tin e.

⁶Izîng nuaia rî lêng chu ṭi no tin a, Sûn lâia lêng ngai siatna khom ṭi ual no tin e.

⁷Ni sîrah sâng ilîr an ta, Ne changtiang sîng ilîr an ta, Nikhomsela, nang chu nang nâi ngam tlak no nih.

⁸Ni mitin en ṭian ni ta, Mi siahei chunga phuba lâkna chu imu bangin mûng ni ti.

⁹PUMAPA chu ni zôknan ni mang a, Chungnungtaka chu ni om nan ni mang sikin,

¹⁰Thil ṭhano rêng rêngin nang tôn no ni a, Rî ṭhano rêng rêng khomin ni omna in hong nâi no nih.

¹¹Ni lampui tinrêngah nang inzôk rangin, Ni chungrichânah khan a vântirtônhei kha nang tir pêk a ti.

¹²Anni khan an kutin nang idom an ta, Lung khom ni ken risui no tin.

¹³Sakeibaknei neh sokngân sir irial ni ta, A nit, sakeibaknei vânglâi neh sokngân chu chîl neng ni ti.

¹⁴Pathian khan, “Ki chungah lungthlungna a bâng ngit sikin inzôk ki ta; PUMAPA ki nit iti a riat sikin chôiinrisâng ki ti.

¹⁵Ani khan a ne koi tikin sâm ki ta; Kei chu lungzîngna a tong lâiin a ziangah om ki ta; Ani chu inzôkin chôiinrisâng ki ti.

¹⁶Ring dam sôtna pêng ki ta, Ki saninringna chu inmûng ki ti,” a ti a.