Read Biete LAPUI 92 Bible Online

LAPUI 92 - Biete bible

LAPUI 92

¹Inpâkna lâ: Sabatnî lâ PUMAPA ziangah lômthu sîr hi a ṭhat vâng na! O Chungnungtak, nangma riming inpâka zâi hei,

²Zîng tina ni lungkhamlianzia inpuang hei, Zân tina ni iamomzia ril hei,

³Thil irîhoi rui sômka neihei, perkhuanghei, Seranda hei, theile hei neh, Nangma nang inpâk hih a hoi vang na!

⁴O PUMAPA, ni sinthohein ni nen lôm a; Ni kut sinthohei sikin râifânin zâi ki ti.

⁵O PUMAPA, ni sinthohei chu a roinpui vang na! Ni ngaituana chu ân thûk vang na!

⁶Mi inmôl khan hihei hih reh thei mak a, Mi invêt khan reh thiam thei mak e.

⁷Mi siahei chu loisûl angkan an hong thuar dût dût a; Thil isual thotuhei khom an hong indon nuang nuang a; Khanniseh, kumkhuaka inrimangin an iom ngai a nit.

⁸Nangmah chu O PUMAPA, Kumkhuakan ân chungtak ni nit.

⁹Ringai ta, O PUMAPA, ne râlhei, Nangma doituhei chu rimang an ti; Thil isual thotuhei khom chekindarin om an ti.

¹⁰Nikhomsela, ker kî hih selechal riki angkan ni chôiinrisâng a; Riak ithar inrithu ki nit tâk.

¹¹Ki mitin ke râlhei tlômna chu a mu tâk a, Ke kuarin mi sual, ne doituhei ilîrna chu a riat tâk.

¹²Mi felhei chu itûm kung angkan thuar an ta; Lebanon tlânga sidar thing angkan thuar an ti.

¹³Anni chu PUMAPA Ina phun an nit a, Ei Pathian Biak In tualzôlah khan thuar an ti.

¹⁴Tar tenan khom la râ mai an ta, Tui ipom ngitkan ringzun an ti.

¹⁵PUMAPA chu mi dik tak a nit ân lang a; Ani chu ki lungpui a nit, Amah-ah khan felnona rêng rêng omak e.