Read Biete THUVÂRHEI 1 Bible Online

THUVÂRHEI 1 - Biete bible

THUVÂRHEI 1

¹Davida naipa Israel rêng Solomona thuvârhei:

²Mihein vârna neh inriseina ṭha an riat a, thu omzia inril takhei an riat theina rang chu a nit.

³Ivâr taka omtlia neh felnahei, diknahei neh thleibîk nei nonahei nang inrisei an ti.

⁴Inmôlhei ivâr takkan a siam thei a; tlangvâlhei riatna rizat nei tlia ân risei ngai.

⁵Hi thuvârhei hin mi vârhei riatna ân ribôk thei a; mi thiamhei lampui ân mu thei ngai.

⁶Khanchu, thuvârhei omzia rithup rilfia theina rang neh mi vârhei thubuai phorsuak riatthiamna ranghei chu a nit.

⁷PUMAPA ṭi hi vârna bul a nit. Nikhomsela, intlohein chu vârna neh inriseina an musit a, risei nuam ngai mak e.

⁸Ki naipa, ni nu neh ni pa nang inriseinaah hin ne kuar sung roh.

⁹An inriseina khan lua lukhum roinpui tak neh ringa rithei enihoi tak angkan ni nunchan inlang a ti.

¹⁰Ki naipa, mi sualhein nang an ithlêmin zôm no roh.

¹¹“Tho ta, mi that rang lei zong rei. A sik om loiin mi ningsiat sin inohei lei tôn rei u.

¹²Ei ritong tiang â ringin ritongpui khom ei la, ei inṭhen tiang chu â thin lei mah rei.

¹³Thil ilu tinrêng nei ei ta, râllâk sumin ei in lei insip rei.

¹⁴Tho, kin lâiah ṭang inla, ei iman tinrêng itlâng ei ti,” an tin.

¹⁵Ki naipa, khangkana mihei lâiah ṭang non la, an mahnia rithokin rikiang roh.

¹⁶Anni chu thilsual isin rangin an rimot a, thisen isua rangin an risiam ṭian mai ngai.

¹⁷Ivahei mitmua châng ikam îte rifena omak e;

¹⁸Nikhomsela, khangkana mihei khan anmani ngêi iôkna rang châng an do a, an thina rang châng an ikam a nit.

¹⁹Tiklâi khomin inruh thilin â rutu ringna a lâk ngai; khasikin, tukhom thisen isua mihei murdi fena lampui chu ama angkah khan a nit.

²⁰Ringai ta, vârna chu khopui kotsuaheiah neh lamilianheiah â khêk suak a.

²¹Iring takkan khopui kotbâihei neh mipui riting bûmnaheiah â khêk a:

²²“Inmôlhei o, itena sôt im inmôlna nin ikan rang? Itena sôt im riatna musitnaah hin nin râi nin înfân rang? Nin irsei tlak ino rang im?

²³Nangni ki rilna tiangah hin nin ikuar sung rei; thu ṭha[1] nangni inrisei ki ta, ki riatna nangni lei sem rong.

²⁴Nangni ki koi mai a, ihong rangin nangni kî fial a nit; nikhomsela, iten be mak chei a, ki tiang khom nin ikuar sung nuam mak chei.

²⁵Nangni ken riseina uksak nuam mak chei a, nangni ki rilna murdi khom ipom nuam mak chei.

²⁶Khasikin, inkhôk nin sik tikin nangni nui ki ta, thlavâi nin tong tikin nangni phengsan ki ti.

²⁷Nin chungah rilônthingna thlipui angkan a hong tlung a, lungzîngna phâivosimpui angkan a hong râng a, dengthei neh thlavâia nin om tikin chu,

²⁸ne koi nin ta; nikhomseh, nangni sâm no ning e. Kil tinah ne zong vêl nin ta, ne mu no tin u.

²⁹Riatna mang nuam viat mak chei ua, PUMAPA thu ôi nuam tlak ngai mak chei.

³⁰Nangni ken riseina dong nuam mak chei a, ki rilna murdi nin ngainêp a.

³¹Khasikin, nin izong tak mûng nin ta, nin sinthohei ngêi khan nangni tông a ti.

³²Mi inmôlhei chu vârna an musit sikin an thi ngai a. Intlohei khom an lungtlukna khah an rimangna a nit ngai.

³³Ki thu ringaihei chu ihoi takkan om an ta, ṭina zel iboiin, izôkriamkan lêng an ti,” ai ti a nit.