Read Biete THUVÂRHEI 10 Bible Online

THUVÂRHEI 10 - Biete bible

THUVÂRHEI 10

¹Solomona thuvârhei chu hihei hih a nit; naipa vârin a pa lômna â thlun ngai a; naipa intlo khan chu a nu beidongna â thlun ngai.

²Dik loi taka richon nî bûm khan nang siam inding no ni a, dikna rêkin chu thina ata ni ringna inzôk a ti.

³PUMAPA khan mi ṭhahei chu vonṭâm an tuang rang phal no ni a, mi pualoihei chu an nuam rithlang an mu nona rangin khâi pai a ti.

⁴Thaboina khan inriangin nang siam a ta, takritâina rêkin chu nang inrichong a ti.

⁵Mi vâr khan bôlzoi lâiin bu a bûm ngai a; ritik bûm zoroa zâlpângpâr itho chu mualphoina a nit.

⁶Mi ṭha khan ṭhatvurna dong a ti. Mi pualoi ṭong chu nunterna ân ṭel sa ngai.

⁷Mi ṭhahei riatmaina chu ṭhatvurna nîng a ta, mi siahei riming rêk chu ringilin om zel a ti.

⁸Riatna nei mihei khan riseina ṭha an ipom ngai a. Mi intlo ṭong itam rêk chu ilîr an ti.

⁹Mi dikhei chu an zôkriam ngai a, mi dik inohei chu imanin om an ti.

¹⁰Tukhom thudik ithup kan buaina â thlun a, tukhom ri-ong taka sêltu chu ringeina siam a nit.

¹¹Mi ṭha ṭongbâi suakhei chu ringna nâr an nit a, mi pualoi ṭonghei chu nunterna sip a nit.

¹²Nelnan buaina â sua a, lungthlungnan chu thonsualna murdi arkhû ngai.

¹³Mi vârhein omzia neiin an ṭong a, mi intlohei chu isôi an inang a nit.

¹⁴Mi vârhei khan riatna an bûm khôm a, mi intlo a ṭongin chu buaina a nâi teng ngai.

¹⁵Richon hi richonghei idingna a nit a, inrianghei rimangna chu an inriangna a nit.

¹⁶Sin iṭha loman chu ringna a nit a, sualna rêkin chu insual ualna tiang a ṭhui ngai.

¹⁷Rilna pomtuhei chu ring an ta, mahni sualna pom nuam inohei chu an thonchâi mai ngai.

¹⁸Mi a mumâkna thuptu chu milak a nit a; mi sîrinsia ngaitu chu mi intlo a nit.

¹⁹Mi a ṭong tam dôrkah ṭong ân sual ngai. Mi vâr chu a bâi â tik ngai.

²⁰Mi ṭha ṭonghei chu tangkarua ṭhatak angkah a nit a; mi pualoi ngaituana chu mangmunboi a nit.

²¹Mi ṭha ṭonghei khan mi itam takkah ân ṭhat ngai a, invêtna rêkin chu mahni thina â thlun ngai.

²²PUMAPA ṭhatvurna khan mi ân richong ngai a. Sin râtna ringotin chu inrichong ual thei ngai mak.

²³Thil isual isina râiinfân chu intlo sin a nit. Mi bengvârhein chu vârnaah khan an lôm ngai.

²⁴Mi felhei chu an thil nuam rithlanghei an mu ngai a, mi siahei rêk chu an iṭi tak khah an chungah tlung a ti.

²⁵Thlisim a hong râng a, mi siahei kha a sêm inrimang a, mi dikhei chu an zôkriam ngai.

²⁶Mi thaboi itir chu thil ithûrin ha a înṭim a, meikhûn mit a înthîp ngai angkah hi a nit.

²⁷PUMAPA ṭi hi ringdam sôtna a nit a; mi siahei rêk chu an zoro tluk man an thi ngai.

²⁸Mi ṭhahei rinpui chu lômna tiang a pan a, mi siahei maton rêk chu rimangna a nit.

²⁹PUMAPA khan mi dikhei chu â hoi ngai a; thilsual ithotuhei chu ân rimang ngai.

³⁰Mi felhei chu indetin om mai an ta, mi siahei chu rinêngah hin izuan om no nih.

³¹Mi felhei bâi khan vârna thu a ril suak ngai a; thu ṭhano rilna lei chu itanin om a ti.

³²Mi felhein chu ipom inrup thu ril rang an riat a, mi siahei chu mi lung isun rang ṭong bang an iril ngai a nit.