Read Biete THUVÂRHEI 11 Bible Online

THUVÂRHEI 11 - Biete bible

THUVÂRHEI 11

¹Ritâna[6] dikino manghei chu PUMAPA khan a nel a; ritâna dik imanghei chu a lôm ngai.

²Mi lârripâkhei chu mualinphoiin om zel an ti. Ringaiitlôm mihei ziangah khan vârna a om ngai.

³Mi fel chu â dikna khan iruai a ti. Mi vârrilethei chu an idiknona khan inrimang a ti.

⁴Richon sum puan hi Pathian roirêl nî sûnin chu îte omzia nei khâi no nih; dikna rêkin chu thina ata ni ringna inzôk a ti.

⁵Mi ṭha dikna khan a ringnun ihoiin a siam ngai a, mi sia chu a sualnaah khan inlîr a ti.

⁶Mi diktak felna khan anmani ân zôk ngai a, iamom inotuhei chu an kuatinkamnaah an iôk ngai.

⁷Mi siahei an thin chu an tûngna khom ai thi sa ngai a nit. Richona ringat chu chanlamboi a nit.

⁸Mi felhei chu lungzîngna ata ihoiin an om a; mi siahei chungah a tlâk lem ngai.

⁹Pathian ngaisak ino mihei ṭong khan a bungtualbômhei â siat ngai a, mi fel vârna rêkin chu mi dikhei a saninzôk ngai.

¹⁰Mi dikhei thluantlung kârkah khua neh tui arngum a, mi siahei an thin râifâna khêk dur dur a om ngai.

¹¹Mi felhei ṭhatvurna khan khua a chôiinrisâng a; mi siahei ṭong rêkin chu khua â siat ngai.

¹²Mi dang musit hih invêt sin a nit. Riatna nei mi chu a dâirek ngai.

¹³Mi mûrithiam rilong diai ngai chu thu rithup ip thei ngai mak a, lungril dik inei mi rêkin chu a ip thei ngai.

¹⁴Riruaina dik a om non chu nam â lîr ngai a. Mi roisak ithiam tamnah chu zôkna a om ngai.

¹⁵Tukhom khualmi lâkai ituak pêk ranga ṭonginkung chu insîr a ti. A thubuaia kop ino khan lungringam riamkan om a ti.

¹⁶Nupang iṭha khan marit a lo a, nupang isual chu izakpui iom tak a nit. Mi thaboi chu richong ngai no nih, mi rât tak chu richon sumpuan nei a ti.

¹⁷Lungkham inei mi khan ama ringna ranga thil iṭha ai sin a nit. Mi nunsia rêkin chu ama takpum dengtheina â thlun ngai.

¹⁸Mi sual sinthoah rifena îte om ngai mak a, mi dik sinthoah chu loman an dong ngêt ngai.

¹⁹Tukhom sin iṭha sin itum ngithei chu ring an ta, thil ṭhano sintuhei chu thîng an ti.

²⁰PUMAPA khan lungril isual mihei khah a nel a, thil iṭha thotuhei chu lung a thlung ngai.

²¹Mi siahei chu deng intheiin om ngêt an ta, mi felhei chu zôk an ti.

²²Nupang mêl iṭha, ridîn nachâng ria no chu vok nâra rângkachak vangkual ikhop angkah a nit.

²³Mi ṭha dit rithlang chu ṭhatna korong a nit a, mi siahein an dit rithlang an mun chu mi tinrêng ningmurna a nit ngai.

²⁴Mi tikithlâi thil phalnan ân richong tîr tîr a; mi tiksia inrepna chu inriangna a nit.

²⁵Ni tik inhoi inla, hong inṭum tîr tîr ni ti. Mi ṭangpui inla, nang ṭangpui an ti.

²⁶A man itam ingâka bu thloitu chu mihein vâni sâm an ta, iphal takka â zuartu chu mihein inpâk an ti.

²⁷Takritâi takka ṭhatna zongtu chu marit[7] ai lo rang a nit; buaina rang izongtu rêk chu ama chungah buaina tlung a ti.

²⁸Mahni richon irinkah chu ṭhâl thing nâhei angkan ṭul a ta, mi fel rêk chu fûr thing nâ angkan hong indon a ti.

²⁹Mahni insung inbuaitu khan a îte nei no nih. Intlohei chu mi vârhei suak chang mai an ti.

³⁰Felna râ chu ringna a nit a, nunterna rêkin chu ringna a lâk ngai.[8]

³¹Mi felhei chu hi rinêng chung ngêiah hin loman ipe an nit ngai a; mi sia neh thil thonsualtu khom dengtheina sik ngêt an ti.