Read Biete THUVÂRHEI 12 Bible Online

THUVÂRHEI 12 - Biete bible

THUVÂRHEI 12

¹Tukhom riatna lungithlung kan rilna arngai innat ngai. Rilna nel mi chu ramsa angkah a nit.

²PUMAPA khan mi ṭhahei chu a ditsak ngai a, pualoina lungril inei mihei rêk chu thiamno ân chang ngai.

³Siatnan mi detna peh ngai mak a; khanniseh, mi felhei chu inîng tlak no nih.

⁴Nupui iṭha chu a pasal lômna neh rênglukhum a nit a; nupui, a pasal mâimôk isaktu chu a ru tôn rinôitu[9] angkah a nit.

⁵Mi dikhei khan thil dik an ngaitua a; mi siahei roisak chu lêmna bang a nit.

⁶Mi siahei ṭong chu thisen isua ranga ruangchuanna a nit a; mi felhei ṭongbâi suak chu rilônthinga omhei a sanisua ngai.

⁷Mi siahei chu richi suanpâr iboiin rimang an ta; mi felhei insungkua chu vângisakin om mai an ti.

⁸Mi bengvârin chu inpâk lông a ta; mi invêt rêk chu mihein musit an ti.

⁹Mi lian angkana oma ifah rang nei ino nêkan chu mi narân mahni sin ithoa fâk rang inei a ṭhat ual.

¹⁰Mi ṭha khan a ranhei a donsui ngai a; mi pualoihei rêkin chu ran chungah an ningthik an inlang ngai.

¹¹Takritâia sin itho mi khan ifah rang a nei a; chanlamboi sina zoro mang inhek chu invêtna a nit.

¹²Mi sia murdi khan thil isual isin rang an zong ngai a; mi felhei chu idet takkan an îding ngai a nit.

¹³Mi sia chu a ṭong nâk nâkah â ôk ngai a; mi dik chu buaina a zôk ngai.

¹⁴Min a ṭong lam angkah takin loman mûng a ta; ama kuta a sintho angkah takin a ziangah ilan nîng a ti.

¹⁵Intlohei khan anmani mitah idikin an ririat ngai. Mi vârhei rêkin chu rilna an ringai ngai.

¹⁶Intlo ningthikna chu voikazelin â lang a; mi vârin chu êsêlna nung a song ngai.

¹⁷Thudik iril chu dikna sin a nit a; milak rêkin chu roirêl diknona tiang a ṭhui ngai.

¹⁸Intlo ṭong hin khandai isun nêkan mi a sun innat ngai a; mi vâr ṭong chu damna a nit.

¹⁹Milak chu itôiteka rang bang a nit a; thutak chu kumtluangin a om mai ngai.

²⁰Thil ṭhano tho tumhei khan thil rikhêl inrît tak sik an ta, tukhom sin iṭha sinhei chu lômna dong an ti.

²¹Mi felhei chungah chu chanlamboi siatna ṭum ngai mak a, mi siahei chu buaina bangin sip an ti.

²²PUMAPA khan milak mihei a theimâk a, an ṭonga iamomhei chu a lôm ngai.

²³Ridîn thei mihein chu an riatzia an thup a, mi invêthein chu an intlôkzia an inpuang ngai.

²⁴Takritâina khan thuneina a pêk ngai a; thaboina khan chu suakin a siam ngai.

²⁵Lungkângna sikin mi ân ngûi ngai a; lungkham ṭongin chu mi râifân a sak ngai.

²⁶Mi fel chu a rualhei rangin ruaitu a nit a; mi pualoihei lampui chu rimangna a nit.

²⁷Mi thaboin chu a irzûl man ngai mak a; mi takritâi rêkin chu richon itam takkah nei a ti.

²⁸Dikna hi ringna lampui a nit a; siatna hi thina lampui a nit.