Read Biete THUVÂRHEI 13 Bible Online

THUVÂRHEI 13 - Biete bible

THUVÂRHEI 13

¹Nai ivârin chu a nu neh pa rilna arngai ngai, mi musit ngaiin chu rilna ringai nuam ngai mak e.

²Mi ṭhahei chu an ṭongbâi suakin loman dong an ta, milakbûrhei chu nunsiatnan lêng bang an inuam a nit.

³A bâi vênginṭha khan a ringna ai vêng inṭhat a nit. Mûrbâi itik thei inon chu mahni rimangna â thlun ngai.

⁴Mi thaboin thil itam takkah rizuk khom sela mu tlak no nih. Mi takritâiin chu ai zong murdi mûng a ti.

⁵Mi dikhei khan milak an nel a; mi siahei ṭong chu izakna neh mualinphoina a nit.

⁶Felna khan mi ningsiat sin inohei chu â hoi ngai a; siatna chu mi sual ilîrna a nit.

⁷Mi ṭhenkahei chu îte nei loiin richong nun an risat a; ṭhenkah nôk rêk chu richong ngitka inriang nun risat an om.

⁸Mi richongin a ringna ritlanna chu archon a nit a, mi inriang rêk chu tutên rikôk ngai mak e.

⁹Mi felhei chu ivâr ri-el tak angkah an nit a; mi siahei chu meiser ithi ṭian angkah an nit.

¹⁰Lârripâkna khan rikhalna bang â sua ngai. Rilna dong nuam mi ziangah chu vârna a om ngai.

¹¹I ol tengka richon nî bûm chu ṭiam zel a ta; dengithei takka nî bûm chu hong pung ual ual a ti.

¹²Sabeina a dongin chu lungril ân nat a, lungbôk a taka hong itlung chu ringna thing a nit.

¹³Inriseina ṭha nungisong kan chu buaina sik an ta; thupêk izômtu chu zôkriam a ti.

¹⁴Mi vârhei inriseina chu ringna nâr a nit a; thina châng ata an zôk ngai.

¹⁵Mi bengvârhein marit an lo a, iamom ino mihei chu ramna lampuiah an om ngai.

¹⁶Riatna nei mihei chu an sin man an ngaitua bak ngai a, intlohei rêkin chu an invêtzia an tlânginzar ngai.

¹⁷Palâi pualoiin buaina â sua ngai a, palâi iamiom rêkin chu ringeina â thlun ngai.

¹⁸Tukhom inriseina dong nuam ino chu a chungah inriangna neh mualphoina tlung a ti. Rilna ringaitu chu chôiinrisângin om a ti.

¹⁹Lungdo tak thluanitlunga a hong iom chu lungril rangin a thlum a; mi sualhein chu sualna nungisong nuam tlak ngai mak.

²⁰Mi vâr ripôlpui inla vâr ni ti. Intlo ripôlpui chu dengthei tuangna a nit.

²¹Mi sualhei chu takmun khomah buainan a zui ngai a, mi felhei rêk chu thil iṭhan ithung nîng an ti.

²²Mi ṭha chu a tuhei tena richon imah pêk rang a nei ngai a, mi siahei richon rêk chu mi fel kutah ipe nîng a ti.

²³Mi inrianghei rang bu vâng zuak theina ram rizat tak a om a; khanniseh, mi dikinohei khan an loi nei rang phal pêk ngai mak e.[10]

²⁴Mi, a nai isôi nuam ino chu lung ai thlung ino a nit a; lung a thlungin chu â sôi ngêt ngai.

²⁵Mi dikhei chu an dikhop ifâk an nei a; khanniseh, mi siahei chu risamin khop tik nei no nih.