Read Biete THUVÂRHEI 14 Bible Online

THUVÂRHEI 14 - Biete bible

THUVÂRHEI 14

¹Nupang ivârin a insungkua a siam inding ngai a, nupang intlo khan chu ama kut ngêiin a ṭhet ngai.

²Dikna neiin chu PUMAPA ṭi mi a nit iti ân lang a; dikna nei inon chu PUMAPA ṭi mi ni mak iti ân lang ngai.

³Intlo ripâkna ṭongin kuttum arkuai ngai a, mi vâr ṭongin chu anmani ân zôk ngai.

⁴Sechal, âl ikâi rang a om non chu fapang a rong ngai a, an omin chu fapang bun a sip ngai.

⁵Thuretu iamomin thudik a ril ngai a, thuretu dikino rêkin chu milak a phua ngai.

⁶Mi musit ngaihei chu tiklâi khomin vârna mu ngai mak a; khanniseh, riatthiamna nei mihein chu thil an riat thei zel ngai.

⁷Intlo ziang ata rikiang roh; a ziang ata îte thil iṭha risei rang mu no tin e.

⁸Mi vârhei vârna bi chu an sintum an riatna hi a nit. Intlohei intlôkna bi chu iria an ritina hi a nit.

⁹Intlohein chu an isualin an ilung kâng ngai mak a, mi ṭhahei rêkin chu ngaidam an zong ngai.

¹⁰Ni lômna chu ni ta a ni ta; ni ngaisiatna khom ni ta a nit. Tutên nang itlângpui thei no nih.

¹¹Mi siahei in a chim nung khomin mi ṭhahei in chu la ding mai a ti.

¹²Mahni ringai ringota lam dik chu thina lam khom a nit duai thei ngai.

¹³Inuinaah khom ngaisiatna a om thei. Râifânna a hek tenan chu beidongna a om mai ngai.

¹⁴Mi siahei chu an siat man mûng an ti. Mi ṭhahei chu an sintho lam angkah takin loman ipe nîng an ti.

¹⁵Intlo khan chu ṭong murdi a iam riai a; mi vârin chu a ke chuang ranghei a en bak ngai.

¹⁶Mi vârin chu buaina a lôina rang a ngaitua ngai a, intlo rêk chu ngaitua loiin a pût zel ngai.

¹⁷Mi lung irâthei chu inmôl takkan sin an tho ngai a; mi vârhei chu lungidâi riamkan an om ngai.

¹⁸Intlohei chu an intlôk man an mu a, mi vârhei chu riatna inkhumin an om ngai.

¹⁹Mi sualhei chu mi felhei makunga khûnin ditsakna ngên an ti.

²⁰Mi inriang chu a suapui, a tanlâi ilua khomin an nel ngai a, mi richong rêk chu suapui itam takkah a nei ngai.

²¹Hamṭhatna idong nuamin chu inriang lunginkham riseh; mi musit hi sual a nit.

²²Thil iṭha tho tumtuhei chu mihein an marit a, an iam zoi ngai a; thil ṭhano ngaituatu khan chu thil an thonchâi ngai.

²³Sin takritâi hi vângsakna a nit a; chanlamboi irila iṭhung ṭian chu inriangna a nit.

²⁴Mi vârhei loman chu richongna a nit a, intlohei rêk chu an intlôkna bangah iria an nit.

²⁵Thuretu thudik isîrna khan mihei ân zôk ngai a; milak a rilin chu mihei ai phial a nit.

²⁶PUMAPA ṭi hi izôkriamka omna a nit a; a naihei rang khomin ribêl inrup a nit.

²⁷PUMAPA ṭi hi ringna nâr a nit a; thina châng lôi theina a nit.

²⁸Rêngin khua neh tui a nei intamin chu a roinpui a; mi a nei inroiin chu a dingmun ân der ngai.

²⁹Mi lungidâi chu mi vâr tak a nit a, mi lung irât chu ân tlôkzia bang tlânginzar a ti.

³⁰Lungril damna chu taksa risêlna a nit a, khôkmâk natna chu rurêt angkah a nit.

³¹Mi inrianghei sirde hi Pathian â siamtu musitna a nit a; mi inriang lunginkham chu Pathian chôiinrisâng a nit.

³²Mi sual chu a sinthonsual khan ama lîrna rang â thlun ngai a, mi fel chu a felna khan ihoi a ti.[11]

³³Vârna chu mi bengvârhei ngaituanaah khan a om mai a; intlohein chu vârna îte reh mak e.

³⁴Dikna khan nam a chôiinrisâng a; sualna chu nam tin rangin mualinphoina a nit.

³⁵Rêng ditsakna chu tirtôn ivârhei chungah a om a, ama phialtuhei chungah chu a ningthikna â ṭhum ngai.