Read Biete THUVÂRHEI 15 Bible Online

THUVÂRHEI 15 - Biete bible

THUVÂRHEI 15

¹Sâmna rivuaiin ningthikna ân rikiang ngai a, he lum rêkin chu ningthik ân thuar ngai.

²Mi vârhei an ṭongin chu riatna rizuk omzia an inlang ngai a, intlohei rêkin chu ṭong chanlamboi an ril ngai.

³PUMAPA mit chu mun tinah a om a; ei sin ṭhat neh ṭhano a thlîr mai ngai.

⁴Lungkham ṭongin ringna a pêk a, nunterna ṭong rêkin chu lungril a dêng ikhoi ngai.

⁵Intlo khan chu a nu neh a pa inriseina zôm ngai mak a; mi vâr khan chu rilna â pom ngai.

⁶Mi felhei khan richon itam takkah an rê a, mi pualoihei chu zoron ṭênah khan an ichân riai ngai.

⁷Mi vârhei khan riatna an sem indar a, intlohein chu kha angkah khan tho ngai mak e.

⁸PUMAPA khan mi fel ṭongṭaina a lôm ngai a, mi sia ribôlna thillan chu a nel ngai.

⁹PUMAPA khan mi siahei lampui chu a nel a, felna lampui izuituhei chu lung a thlung ngai.

¹⁰Thil isual isintu chu inah takka denginthei nîng a ti. Rilna pom ino chu rimangna a nit.

¹¹Mithi khua ten khom PUMAPA khan a mu vang a, miriam lungril vâng chu ai mu infel rang vang na!

¹²Mi musit isong ngaihei khan rilna idi ngai mak a; mi vârhei ziangah khom îte ridon nuam ngai mak e.

¹³Lungril a lômin chu mitmâi ân fân a; lungril beidongna khan chu mêl ân ngûi ngai.

¹⁴Mi bengvârhei khan risei an nuam a, intlohei chu an intlôknaah khan an ilung a tluk ngai.

¹⁵Inriang rangin chu sûn murdi hi isôl iom tak korong a nit a, mi lungril ifânhei chu nîn tin râifânin an mang mai ngai.

¹⁶Richong ngutka buaina nei nêkan chu inriang fapka PUMAPA ṭi hi a ṭhat ual.

¹⁷Rinuar khapka sa thâi tak ifa nêkan chu mi lung nî thlunghei neh thlâi iring ringot ifa khom hi a hoi ual.

¹⁸Lung irâtin rikhalna â sua ngai a, lungrivuaina khan chu ringeina â thlun ngai.

¹⁹Mi thaboin chu mun tinah intakna sik a ta, mi dik rêkin chu buaina nei no nih.

²⁰Nai ivârin chu a pa ân lôm ngai a. Nai intlo bang kêng a nu musit ngai.

²¹Intlohein chu an intlôkna kha an râifânna a nit a, mi vârhei chu thil iṭha an sin ngai.

²²Ngaitua bak loia sin itho chu thluantlung ngai mak; lungvâr isak thei tamnah manchang suakna a om ngai.

²³A zoro taka sâmna diktak iria hi ilôm a om vang na!

²⁴Mi vârhei chu ringna panna lampuiah an fe a; Seol panna lampuiah chu fe nuam ngai mak e.

²⁵PUMAPA khan mi risonghei in chu ikar pai a ta, numeihei richon chu sunghual a ti.

²⁶PUMAPA khan mi sualhei ngaituana chu a nel a, mi rithianghei ṭong chu a lôm ngai.

²⁷Mi kuatinkam khan ama insungkua ân buai ngai a, fâkinrûk fah ngai inotu chu vângsak a ti.

²⁸Mi ṭhahein chu mi an sâm rang tlia an ngaitua bak ngai. Mi ṭhanohei rêkin chu mi an sâm zel a, buaina an isua ngai.

²⁹Mi ṭhahei ṭongṭaina chu PUMAPA khan arngai ngai a, mi siahei rêk chu a lat ngai.

³⁰Mêl ifânin mi ân lôm a, thurchi lôm iomin mi ân har ngai.

³¹Rilna tianga kuar isung mi chu mi vâr lâiah ṭang sâng a ti.

³²Risei nuam ino chu mahni rimusit a nit a, rilna pom rêk chu hong vâr a ti.

³³PUMAPA ṭi hih vârna riseina a nit zel a. Ringaiintlômna chu chôiinrisânga omna a nit.