Read Biete THUVÂRHEI 16 Bible Online

THUVÂRHEI 16 - Biete bible

THUVÂRHEI 16

¹Lungrila lei ingaitua inrifûk hi miriam sintum a nit a, a thluantlungna chu PUMAPA thu thu a nit.

²Mi, mahni ringaiin ai tho murdi â dik a ti thei; khanniseh, Pathianin chu lungril tumna kêng ai thlîr ngai.

³Ni ngaituanahei ṭhativur rangin PUMAPA ngên inla; khanchu, ni ngaituanahei kha lo tluk takkan sin thei ni ti.

⁴PUMAPA thilsiam murdi hi tumbîk inei korong an nit a; mi sualhei khom siatna tong ranga siam an nit.

⁵Lungrila lârripâk murdi chu PUMAPA ranga itiriom an nit; dengtheina tuang loiin isua no nih.

⁶Dikna neh iamomna nei chu Pathianin a sual a ngaidam ngai a. PUMAPA ṭi hi thil ṭhano mâkna a nit.

⁷Mi, a omdânin PUMAPA ân lômin chu â râlhei khom rual ṭhan a siam thei ngai.

⁸Dik ino taka lâklût intam ok nêkan chu idik taka iroicheka nei a ṭhat ual.

⁹Min a lungrilin a sin rang a ngaitua thei; khanniseh, a kalchôi rang dân chu PUMAPA khan a zêk ngai.

¹⁰Pathian ritha neinan rêng khah a ṭong a; a roirêlhei tinrêng â dik ngai.

¹¹Varna neh rikhîna dik hi PUMAPA nuamlam a nit a; a nit, varna tinrêng â dik rang a nit.

¹²Pualoina hi rênghei ranga itiriom a nit a, dikna sik bangin rêngṭhungmun hi indetin ai om a nit.

¹³Thudik hi rêng lômna a nit a; thudik irilhei chu ditsak a ti.

¹⁴Mi vâr khan rêng inlôm tum a ta; rêng ningthikna chu thithang ikoi angkah a nit.

¹⁵Rêng mêl ivârah khan ringna a om a; a ditsakna chu rua nungkhôn insûr ngai sûm angkah a nit.

¹⁶Rângkachak nêkan khom vârna nei hi a ṭhat ual a; a nit, tangkarua nêkan khom riatthiamna hi rithlang ual rang a nit.

¹⁷Mi ṭhahei khan sualna lampui nung an song ngai a; khasikin, a lam lônna vêng inṭha khan a ringna a înzôk a nit.

¹⁸Ripâknan chu rimangna tiang a ṭhui a, risongnan ilîrna tiang a ṭhui ngai.

¹⁹Mi lârripâkhei neh râllâk thil risem nêkan chu ringaiintlôm taka inriang ini a ṭhat ual.

²⁰Inriseina ringaisak mi chu thluantlungna dong a ti. PUMAPAa ringat mi chu mi hamṭha a nit.

²¹Mi vâr puitling chu a vârnan mîn riang an ta; a ṭongbâi thlum dôrkah mi â nê ngai.

²²Mi vâr rangin vârna kha ringna nâr a nit a, mi invêt inrisei itum chu chanlamboia zoron hek a nit.

²³Mi vârhei khan an ṭong man an ngaitua bak a; an itihei murdi khan lungril â nê ngai.

²⁴Ṭong iṭha chu khuaitui angkah a nit. Ringna rangin a thlum a, takpum ranga risêlna a nit.

²⁵Mahni ringaia lam dik angkana lang, a mongna chu thina khom a om.

²⁶Sin mi khan a fâk rang sikin sin a tho a, a vonṭâm inboinan sin a tho ual ual ngai.[12]

²⁷Mi siahei khan thil ṭhano an ngaitua suak a; an ṭongbâi suak khom mei angkah a nit.

²⁸Mi pualoihei khan ṭong chanlamboi an ril indar ngai a; rikhih zizata buaina suan rualrichanna an ṭhen ngai.

²⁹Mi nunsiahein an rualhei an lêm a; siatna tiang an ṭhui ngai.

³⁰An rikam ipet a, nang imît ving mihei ata ridîn roh; thil ṭhano im manih an ingaitua a nit.

³¹Ringdam sôtna hi mi fel loman a nit a; lu ṭuak hi an roinpuina a nit.

³²Mi lungril rivuai hi mi rât nêkan a ṭhat ual. Mahni lungril isôi zoi hi khopui inê zoi nêkan a ṭhat ual.

³³Miriamin Pathian nuamlam riatna rangin thla an sân ngai a; nikhomseh, Pathian ngirin sâmna chu ai pêk ngai a nit.