Read Biete THUVÂRHEI 17 Bible Online

THUVÂRHEI 17 - Biete bible

THUVÂRHEI 17

¹Buaina sip ina ruaiṭhe fah nêkan chu ringei irka bu ṭhing irin a ṭhat ual.

²Suak ivâr khan a pu naipa mangmunboia chungah khan thuneina nei a ta, richon dongtum khom nei sâng a ti.

³Rângkachak neh tangkarua chu meiin arthît a, miriam lungril chu PUMAPA khan a fia ngai.

⁴Mi ṭhanohein chu ṭhano tiang an ikuar an sung a, mi mînlakhei khomin milak tiang an ikuar an sung ngai.

⁵Mi inrianghei phengsantu khan Pathian â siamtu ai musit a nit. Mi vânduaina riamtu chu kuttum tong loiin om no nih.

⁶Naipahei roinpuina chu an pahei hi an nit a, patarhei roinpuina chu an tu neh tehei an nit.

⁷Mi manrithein milak ril ngai mak a; intlohei rêk chu ṭong rimal inei isîr rang nei ngai mak.

⁸Mi ṭhenka ringai dânin chu fâkinrûk hi dôi angkan sin a tho thei a; thil tinrêng ai tho thei angkan an iam ngai.

⁹Mi thonsualna ngaidamtu khan lungrithlungna ai zong a nit. Mi thonsual riatmaina khan rualrichanna a ṭhen ngai.

¹⁰Intlo voi rizaka bêna a irsei nêkan mi vârin voika ngonaa a irsei a tam ual ngai.

¹¹Mi sia buaina siam ṭian ṭian ngaihei chungah khan thina kha thangikoi angkan tlung a ti.

¹²Intlo, invêt sina buai ritongpui nêkan chu ivompui a tehei ilah pêk riai tâk ritongpui inuam a om ual.

¹³Ṭhatna, suala thung nôk ngaitu chu thil ṭhanon a in thlân tlak no nih.

¹⁴Rikhalna phut chu tuitial iṭe angkah a nit a; khasikin, ritôk rihêm â thlun man ringam roh.

¹⁵Mi sual thiam inchangtu neh mi ṭha thiamno inchangtu chu PUMAPA ranga itiriom seng seng an nit.

¹⁶Intlo thiamna neina ranga sum ithâm chu îte rifena omak, mahnia riatna a nei no sikin îte thiam no nih.

¹⁷Rual iṭha khan chu tiklâi khomin lungthlungna ân lang ngai. Inzirpui hi lungzîng nikhua a ranga suak an nit.

¹⁸Riatna nei ino mi bang kêng mi dang lâkai chunga mophurtu ranga ṭonginkung ngai.

¹⁹Sualna ringainna mi khan chu buaina a irngai innat a nit. A neina song zel zel mi khan chu buaina ai zong a nit.

²⁰Tukhom thil ṭhano ngaitua ngai neh isîr ngaiin chu thil iṭha mu ngai mak a, siatna bang mûng a ti.

²¹Nai helâkloi inei nu neh pa chu an bei a dong ngai, kha angkana nai inei nu neh pa chu lôm ngai mak.

²²Lungril fânna hi damna ṭhatak a nit a; lungril ngûinan chu ru ân châr ngai.

²³Roirêltu dikinon idâirekkan fâkinrûk an lâk a, roirêlna dik mang ngai mak e.

²⁴Mi vârin chu ivâr sin a tho ngai a; intlo chu kil tin â khîk suai ngai.

²⁵Naipa intlo chu a pa beidongna thluntu a nit a; a nu rang insîrna â thlun ngai.

²⁶Mi felhei intuang ṭha mak e; mi ṭhahei kuttum ithoa an omin chu rêlna dik ai om ino a nit.

²⁷Riatna nei mi khan chu a bâi â tik ngai. Lungrivuai takka om mi khan riatthiamna a nei.

²⁸Intlo khom a dâirekin chu mi vâra tep inrup a nit a; a bâi â pip ṭianin chu mi lunginṭong ineia be thei a nit.