Read Biete THUVÂRHEI 19 Bible Online

THUVÂRHEI 19 - Biete bible

THUVÂRHEI 19

¹Mi intlo, milak bang itho ngai nêkan chu mi inriang lungril iṭha tak riputa om a ṭhat ual.

²Riatna boia nuamna ringot khom hi ṭha mak e; lung irang rai mi chu buaina a sik ngai.

³Mi ṭhenkah chu an invêtna khan anmani â siat a; khanungchu, an lungrilin PUMAPA an nuar ngai.

⁴Richonghein rual itam takkah an nei a, inrianghei chu an rual neisunhei khomin an mâk ngai.

⁵Riatpuitu dik ino chu kuttum tuang loiin om no ni a, milak ṭong chikinrichuan chu zôk no nih.

⁶Mi tam takkan mi lianhei ditsakna dong an tum ngai a; mi ditsaktu chu mi tinrêng rualṭha a nit.

⁷Mi inriang chu ân zirpuihei ilua khomin san nuam ngai mak a; a rualhei vângin chu an ilat rang vang na! Ingka dôran tum khom seh tute mu no nih.[14]

⁸Vârna nei khan ama ringna lung ai thlung a nit a; riatna vongtu chu vângsak a ti.

⁹Riatpuitu dikino chu kuttum tuang loiin om no nia, milakbûr chu rimang a ti.

¹⁰Intlo chu nunkhohoin om no sela, suak khom rêng naihei chungah thu nei no riseh.

¹¹Ringai thiamna nei mi khan chu a ningmur â ṭhuai thei ngai. Mi thonsualna uksak ino hi roinpuina a nit.

¹²Rêng ningthik chu sakeibaknei irung angkah a nit a, a ditsakna rêk chu ṭhatvur rua angkah a nit.

¹³Nai intlo khan chu a pa rang vânduaina â thlun ngai. Nupui rângisia chu tui rifâm mai angkah a nit.

¹⁴Min a pa rithokin in neh richonhei a lua thei; nikhomseh PUMAPA a rithok bangin kêng nupui ivâr chu imu thei ai nit.

¹⁵Ni nuamin chu ner tha inboi inla, zâl ṭian roh; nikhomsela, vonṭâmin om ni ti.

¹⁶PUMAPA dân izôm inṭha kan a ringna ai vong inṭhat a nit; a omdâna ridîn ino rêk chu thîng a ti.

¹⁷Inrianghei isan chu PUMAPA a înritâng angkah a nit a; a sintho ṭhat chu PUMAPA khan thung a ti.

¹⁸Ni naihei kha an la naiinpang lâiin isôi roh. A nit non chu an rimangna rang lampuia ṭangpui nîng ni ti.

¹⁹Mi ningthik ina khan kuttum a tong ngai. Buaina rithokin ni kêlisua nung khomin, la kêlisua nôk mai nang a ti.

²⁰Rilna tiang ne kuar ni sung a, risei ni nuamin chu mi vâr la hong nîng ni ti.

²¹Miriam lungrilah thil itam takkah ingaitua om khom sela, a nungkhônah chu PUMAPA lungdo iding a ti.

²²Kuatinkam hi mualphoina a nit a; mi mînlakhei nêkan chu inrianghei an ṭhat ual.

²³PUMAPA thu zôm hi ringdam sôtna a nit a, lungitluk takkan an om a, thil ṭhanon rikhû ngai mak.

²⁴Mi ṭhenkah chu an bâia bu hang ithun tak khom an ngîk ngai.

²⁵Mi risonghei kuttum itho a ṭhat; khanchu, mi inmôlhei hong risei thei an ti. Riatthiamna nei chu ril inla, hong vâr a ti.

²⁶A pa denginthei a, a nu ûmisuatu chu naipa, mualphoina thlun a, riming siatna thluntu a nit.

²⁷Ki naipa, risei ni bângin chu nî riat tâkhei khom khah ringil phar ni ti.

²⁸Riatpuitu dikino khan roirêlna dik ai musit a nit. Mi siahei khan sualna lung an thlung ngai.

²⁹Roirêlna chu mi risonghei ranga siam a nit a; Kuttum chu intlohei iruang rang a nit.