Read Biete THUVÂRHEI 20 Bible Online

THUVÂRHEI 20 - Biete bible

THUVÂRHEI 20

¹Zu in hi nuizabûra mi siamtu a nit a; zu inrui hi invêtna a nit.

²Rêng ningthik kha ṭi roh, sakeibaknei irung angkah a nit a; a ning inthik pêk chu mahni ringna chân theina a nit ngai.

³Intlohei khan chu ringo an phut ngai a; anni lâia rithoka rikiang hi riming ṭhatna a nit.

⁴Sinmi rithaboi, a zoro taka rinêng tuk ngai ino chu bu ât zoron a kut korongin om a ti.

⁵Miriam lungril ngaituana chu tuikuang inthûk taka tui angkah a nit a; nikhomseh, riatthiamna nei khan thâl suak a ti.

⁶Mi tam takkah iamom riti korong an ta; nikhomseh, mi iamom tak tak nangman imu tum roh.

⁷Mi fel, dikna nei mi naihei chu hamṭha an nit.

⁸Roirêlnaa rêng iṭhung khan a mitin thil ṭhanohei murdi a mu zel ngai.

⁹“Ki lungril arthiang a, sual ata ki irthiang a nit,” tûm a ti thei rang?

¹⁰PUMAPA khan varna neh rikhîna dikino mang mihei chu a nel ngai.

¹¹Naipangte lua a sinthon a nitna ân lang ngai a; naipang iṭha a nit neh nitno a sinthoa rithokin ireh thei a nit.

¹²Riat theina kuarhei neh mu theina mithei hi PUMAPA ne ipêk a nit.

¹³Ritha inboi a, zâlpângpâr ithon ni zoro ni mangin chu hong inriang ni ti. Sin thon la, fâknêk khop inrup nei ni ti.

¹⁴Thil richotu khan a man a lut rai a ti ngai a; khan a kîr nôk tenan chu a man a inriniamah khan arpâk nôk ngai.

¹⁵Ni îsîr khah ni riat infelin chu rângkachak neh lungilu nêka thil ilu ual nî nei a nit.

¹⁶Intlo khualmi lâkai chunga mophurna lah ranga ṭonginkungtu chu ama richon khom siakhamin itung a ti.

¹⁷Dikino taka nî lâklût chu bu tui tak angkan fah thei ni ta; nikhomseh, nungah chu lungchirit ibâr angkah nîng ni ti.

¹⁸Roi nang isakpui rang zong inla, thluantlung ni ti; ngaituan fel bak loiin irâl doi no roh.

¹⁹Ṭong itam mihein chu thil rithup ip thei ngai mak; khasikin, anni zianga rithokin rikiang roh.

²⁰A nu manih, a pa manih, vâni sâmtu chu zîng richelchit nuaia meiser ithatdip angkan a ringna mong a ti.

²¹Richon hi atîrah iol tengka bûm thei zel ni man sela, nungah chu ṭhatvurna ni zit ual no nih.

²²“Sual chu lei thung zel rong,” ti no roh. PUMAPA ngâk inla, aman indik a ti.

²³Ritâna neh varna dikino hi PUMAPA mitmua itiriom tak a nit.

²⁴Miriam lampuihei chu PUMAPA înkung a nit a; ingkan im miriamin a ringna lampui a riat thei rang?

²⁵Pathian zianga thil ilan ranga nen kung man ngaitua bak roh; nungah nen sîr nôk duai lôiin.

²⁶Rêng ivâr khan thil thonsualtu kha man suak a ta, lungkhamna boiin kuttum thông a ti.

²⁷Miriam lungrila ngaitua theina chu PUMAPA meiser a nit a, eimania rithokin îte thup thei no min e.

²⁸Rêng kha ṭhatna, felna neh diknan roi a rêl kârkah inlal a ti.

²⁹Vânglâihei roinpuina chu an râtna hi a nit a, itarhei marit omna chu an ibâ ṭuak hi a nit.

³⁰A kârah chu ei lampui lônna indikna rangin intakna itam takka ritem ai nang ngai a nit.