Read Biete THUVÂRHEI 21 Bible Online

THUVÂRHEI 21 - Biete bible

THUVÂRHEI 21

¹Rêng lungril chu PUMAPA khan a zêk a; tuidung luangna vakong ai siam angkan a nuam nuamnah ân kôi ngai.

²Mi tinin an omdân tinrêng hi anmani mitah chu â dikin an be ngai a, PUMAPA rêkin chu lungrila tum dân kêng ai var ngai.

³Ribôlna nêkan dikna neh felna sin hi PUMAPA lôm lam a nit.

⁴Mi siahei chu an ripâkna neh an risongna khan an lungril a zêk a, amakhah sual a nit.

⁵Mi takritâi ngaituana khan richongna tiang a pan a; mi thaboi rêk chu risamna tiang bang a pan ngai.

⁶Dikino taka richon ibûm chu rimang zel a ta, â zongtu rangin thina a nit.

⁷Mi siahei chu an nunsiatna khan anmani inrimang a ta; thil iṭha sin an nuam no sikin.

⁸Thiamno changhei lampui chu a kôi neng ngai a; mi ṭhahei chu thil iṭha an tho ngai.

⁹Nupui rângisia neh munka in ihoi taka om nêkan chu inchung kilkhôra om a ṭhat ual.

¹⁰Mi siahei lungril khan thil ṭhano arzuk mai ngai a; tute chungah lungkhamna nei ngai mak.

¹¹Mi musit ngaihei dengintheia an omin chu mi inmôlhei an lei vâr ngai; khante, mi vârin chu inriseina ai dong kha a riat mai ngai.

¹²Pathian, Mi Fel khan mi siahei insunga thil iom a riat a; khasikin, mi siahei chu inrimang a ti.

¹³Inrianghei ṭapna ner ngai non chu nang khom ṭangpui ringaia ni ṭapna ringaiin om no nih.

¹⁴Mi ni chungah a ning a thikin chu idâireka thilpêkin â lung iṭhuai a ti.

¹⁵Roirêl dikin chu mi felhei ân lôm ngai a; mi ṭhanohei rang rêkin chu rimangna a nit.

¹⁶Mi tukhom riatna dik ata vâi chu thinan a ngâk ṭian ngai.

¹⁷Nunkhohoi bang rizuk chu inriang a ta, zu neh sa ringaiinna mi chu richong no nih.

¹⁸Mi siahei chu mi felhei dengintheina ranga an châng do nâk nâkah khan anmani an ripal ngai.

¹⁹Nupui rângisia, chiar ṭian ṭian neh munka om nêkan chu ramchâra om a ṭhat ual.

²⁰Mi vâr chu richong tak neh ihoi takkan om a ta; intlo rêkin chu sum a mu kaneh a mang let ngai.

²¹Dikna neh lungkhamna nei inla, ni dam sôt a ta; mihei maritna neh chôiinrisângna dong ni ti.

²²Ruaitu vârin chu mi râthei khopui a lâk a, an kulbang ringatna khom â sim ngai.

²³Buaina ata rikiang ni nuamin chu ne lei vêng inṭha roh.

²⁴Ripâk neh risong mi chu musittuah a nit a; mi liana riben ripâk takkan sin a tho ngai.

²⁵Mi thaboi, sin zong nuam ino chu amah bang a irthat a nit.

²⁶Mi thaboi khan sûn thluanin ai nuam nuam ngaituana bangin kêng zoro a înhek ngai; mi fel rêkin chu a pêk a, thloi loi takkan a pêk ngai.

²⁷PUMAPA khan mi siahei ribôlna thilpêk chu a nel a, a bîkin lungril isual riputa an hong ilan vâng chu a nel ual ngai.

²⁸Riatpuitu dikinohei thusîr chu tutên iam no ni a; nikhomsela, riatpuitu dikhei ṭong chu ipom nîng a ti.

²⁹Mi siahei chu â anga lang hi an thei lam a nit a; mi felhei chu an lampui an rêl infel ngai.[15]

³⁰Miriam vârna hei, riatna hei neh thiamna hei hi PUMAPA doina a nitin chu chanlamboi a nit.

³¹Sakor chu irâl buala mang rangin nen risiam ṭian thei; nikhomsela, nêna chu PUMAPA ta a nit.