Read Biete THUVÂRHEI 22 Bible Online

THUVÂRHEI 22 - Biete bible

THUVÂRHEI 22

¹Richongna nêkan riming ṭhatna hi a ṭhat ual, riming ṭhatna rithlang roh.

²Richong neh inriang ri-angna chu PUMAPA isiam seng seng an nit.

³Mi bengvârin chu siatna hong itlung rang a lei mu a, a lôi ngai a; mi inmôl chu archôm dum a, a tuang ngai.

⁴PUMAPA ṭina neh ringaitlômna nei inla, ring sôtna, chôiinrisângna, richongna hei dong ni ti.

⁵Ni ringna lung ni thlungin chu mi siahei iôkna ngai châng ata rikiang roh.

⁶Naipang chu omdân iṭha inrisei inla, a dam sungin ithla no nih.

⁷Inrianghei chu richonghei suak an nit. Lâkai ni lâkin chu nang inritângtu suak ni nit.

⁸Diknona chi tu tûn chu siatna ât a ta, ningmura mi chunga irol ilek chu ikhiak nîng a ti.

⁹Mi tikihoi chu ṭhativurin a om ngai, a fâk rang inrianghei a sem pêk ngai sikin.

¹⁰Mi musit ngai kha heng pai inla; khanchu, ringo rikhal rikiang a ti; a nit, risualnahei, risêlnahei boi a ti.

¹¹Lungril rithiang neh lungkhamna ṭong ithlum nen lutin chu rêng khom ni rual nîng a ti.

¹²PUMAPA mit khan riatna nei mi chu a vong inṭhat ngai a; vârrilethei thu chu a pai phar ngai.

¹³Mi thaboi khan insungah a om ṭian a, “Pu ki pêtin chu ikeiin ne sê that a ti,” a ti ngai.

¹⁴Nupang isual mûr chu châng a nit; amakhan PUMAPA inelhei chu iôk an ti.

¹⁵Nupanghei lungrilah khan intlôkna a kop ngit a; nikhomseh, inriseina rol iṭha khan siam inṭhâng a ti.

¹⁶Richonghei lunghoi isaka thilpêk ipe neh richong rang inuama inrianghei nuaisia chu mahni risamna bang ithlun a ti.

¹⁷Ne kuar sung inla, mi vârhei thu ringai roh. Ni lungril chu an inriseinahei dongnan mang roh.

¹⁸Ni lungrilah ni vong a, ni bâiah ni mang sa theiin chu lôm ni ti.

¹⁹Ni iamna khah PUMAPA chungah ner ngat theina rangin; atûnah hin ni ziangah nang ki îsîr pêk a nit.

²⁰Nangma rangin thuvâr sômithumkah ki irziak a nit. Riatna neh rilna ṭhahei a om a,

²¹thutak im ai nit nang inrisei a ti. Khanchu, thutak imuh suak ranga itira ni omin sâmna dik tak hong kîrpui thei ni ti.

²²Ni tho thei sikin inrianghei khuruk tho non la; roirêl munah mi lungindonghei riamchânin nei no roh.

²³PUMAPA khan an chungthu thlop a ta, anmani roktuhei ringna chu irok a ti.

²⁴Mi tôksol chu rualin siam non la, mi nunsia chu ripôlpui no roh.

²⁵Anmani omdân risei ni ta, ni nunchan thleng thei khâi loiin châng nang ni pêk a ti.

²⁶Mi dang lâkai chungah mophurtu rangin ṭonginkung no roh.

²⁷Ni thung thei non chu ni zâlmun ten khom nang lah pêk an ti.

²⁸Ni pi neh puhein ramrî an lei ikhang kha phêt no roh.

²⁹Takritâia sin iṭha sin mi nen mun la, mi vântlâng nêka ṭha, rênghei rualrichanpui thei mi tluk nang inmûng ki ti.