Read Biete THUVÂRHEI 23 Bible Online

THUVÂRHEI 23 - Biete bible

THUVÂRHEI 23

¹Mi lian neh khalai nin otin, ni lungrilah tûm ai nit iti reh leng roh.

²Nen vun ok khoma rikâi viat roh.

³Fâknêk itui tak nang ai doheiah khan inruak non la; nang lêmisia ai tum khom a nit duai thei.

⁴Vâr inla, richong ringot itumin sôl no roh.

⁵Sum chu rithla risiama vuangpai angkan mit khapkarkan vuangpai a ti; mupui angkan vânlâizôlah khin vuang a ti.

⁶Mi tikisia khalai ot non la; a fâk itui dohei rizuk no roh.

⁷“Tho hong roh, hong fah roh,” a tin, a lungril taka ti ni mak e. A ngaitua lam angkah takin kêng a nitna chu ai nit.

⁸Ni thil fâk kha iluak nôk pai ni ta, amah nen pâkna kha â tlong nîng a ti.

⁹Intlo riatah ṭong omzia nei iril tum no roh; ni thuvârhei kha inlutna châng reh no nih.

¹⁰Tianlâi ramrî lui kha phêt tlak non la, farahei ram richupui no roh.

¹¹PUMAPA chu anni sunghualtu rât tak a nit a, nangma doiin an chungthu thlop a ti.

¹²Riseina tiang ni lungril pen la, ne kuar kha riatna thu tiang sung roh.

¹³Naipang isôi ridîn no roh. Inriseina rolah khan thi no nih.

¹⁴Irolin nen riseiin chu thina ata a ringna inzôk thei ni ti.

¹⁵Ki naipa, ni vârin chu ki lungril lôm tak tak a ti.

¹⁶A nit, ni bâi ata vârna thu ki riatin chu lôm ki ti.

¹⁷Ni lungrilin mi sualhei rizuk no seh; PUMAPA ṭina hi ni ringnun thupui tak ni riseh.

¹⁸Khanchu, matiang sûn rivak tak nei ni ta, ni tûngna chu inboiin om no nih.

¹⁹Ki naipa, ringai inla, vâr inla, ni ring dân lampui ngaituan thûk roh.

²⁰Zu du mihei neh fâk idu mihei ripôlpui no roh.

²¹Zûnrui mihei neh rôlruak mihei chu hong inriang tîr tîr an ti. Ifâk neh izâl bang ni thon chu puanṭet sil zel ni ti.

²²Nang ineitu ni pa thu ôi inla; ni nu khah a hong tarin musit no roh.

²³Thudik hei, vârna hei, thiamna hei, riatthiamna hei richoh roh, zuar nôk khâi no roh.

²⁴Mi dikhei pa chu iṭha takkan a râifân a ta; naipa vâr ineitu khan lômna nei a ti.

²⁵Ni nu neh ni pa chu inlôm inla, nang ineitu ni nu chu râifân takkan in-om roh.

²⁶Ki naipa, ni lungril ne pen la, ki ringnun hi ni enton ni riseh.

²⁷Nochizuar neh nupang ingal chu thina châng an nit.

²⁸Suam mihei angkan nang an ridîp ṭian a; mi itam takkah rithiang nonah an itlâk ngai.

²⁹Tuhei im chung inkhôk ngai, tuhei im beindong ngai, tuhei im arngo ngai? Tuhei im thubuai inei ngai, tuhei im a bi om loia sâbe tuang ngai? Tuhei im an mit ichok zap ngai kha? Zu buala om mai ngaihei, zu du mihei kha an nit.

³¹Zu khan nang â thlêm rang phal no roh, a sen râk khom a, a fil liai khom a, a nit nole a phûl sap sap khomin en no roh.

³²A nungkhônah chu irûl angkan nang ichuk a ta; irûl tûr irât chi angkan nang ichuk a ti.

³³Ni mitin thil rikhêl inrît tak takhei mûng ni ta, ni lungrilah ngaituana fel nei thei no tin a, ifiang takkan khom ṭong thei no tin e.

³⁴Tuikhanglian chunga zâl angkan manih, rikuang puanzâr ngul sîpa om mai angkan manih ririang ni ti.

³⁵“An ne tôk a; khanniseh, nah mak e; an ne zêp a; khanniseh, îte lak reh khâi mang e. Ithôm ki har thei tlak no? Lâ in nôk mai kî nang kêng,” tîng ni ti.