Read Biete THUVÂRHEI 24 Bible Online

THUVÂRHEI 24 - Biete bible

THUVÂRHEI 24

¹Mi siahei rizuk non la, annihei rualrichanpui no roh.

²An lungrilin buaina siam bang an ngaitua ngai a; an bâiin mi theimâk rang thu bang kêng an îsîr ngai.

³Insungkua chu vârna neh riatthiamnaa sin inding a nit.

⁴Riatna omna kipah insung chontan tinhei chu thil ilu neh en ihoi takheia inrivo a nit ngai.

⁵Vârna hi râtna nêkan a ṭhat ual a; a nit, riatna hi ritha nêkan a ṭhat ual.

⁶Ni doi man iṭha takkan râlrêl bak inla, lungvâr nang isak an tam dôrkah nêna chu chang ni ti.

⁷Intlohei rangin thuvâr chu ân ril rai a; thupui thute sîrinrituk zoron îte iti rang nei phâk ngai mak e.

⁸Thil ṭhano ni phan maiin chu mihein buaina siam ngaitu nang tîng an ti.

⁹Intlo ngaituana chu sual a nit. Mi musit ngai chu mi nelfung an nit ngai.

¹⁰Lungzîng nikhuan ner zal nengin chu ni irzal titak a nit.

¹¹Dikino taka ithat rang tâkhei chu inzôk vak roh.

¹²“Kei chu îte reh mang e,” ni ti thei, Pathianin chu ni lungril tumna a riat a, ai var mai kêng. Nang a thlîr ṭian a; nang a riat riai. Ni sintho lam angkah takin nang thung nôk a ti.

¹³Ki naipa, khuaitui in roh, â ṭha a nit. Khuaithlâra rithoka khuaitui ne leiah ai thlum bîk angkah hin

¹⁴vârna chu ringna ranga ṭha a nit iti rianfel ni ti. Vârna ni neiin chu ni sûn maton rivak a ti.

¹⁵Mi siahei angkan mi dikhei in irok tum no roh.

¹⁶Mi fel chu voi itam takkah ilîr khom sela, a thoinôk mai ngai; mi siahei rêk chu siatna khan ân rimang ngai.

¹⁷Ne râlin siatna a tongin lôm non la, â lîrin ni râiinfânin riiam no roh.

¹⁸Khanonchu, PUMAPA khan nang mûng a ta, lôm no ni a, a chunga a kuttum kha inrilêk duai a ti.

¹⁹Thil ṭhano sintuhei sikin ni beindong non la, annihei kha rizuk no roh.

²⁰Mi siahei chu sûn maton itûng rang nei mak a, an meiser chu ithatdip nîng a ti.

²¹Ki naipa, PUMAPA ṭin la, rêng kha marit tho roh. Anni doia rihel mihei kha rithloppui no roh;

²²Khaangkana mihei kha chu tukvakkan inrimangin om an ti. Pathianin manih, rêngin manih an chungah siatna an ithlun pêk thei iti reh roh.

²³Hihei khom hih mi vârhei thusîr a nit: Roirêltu rangin thleibîk inei hi ṭha mak e.

²⁴Mi pualoi thiam inchangtu chu mi tinin nel an ta, vâni sâm an ti.

²⁵Roirêltu, mi dikino intuangtu chu mihein lôm an ta, riming ṭhatna lông a ti.

²⁶Thu dik taka sâmtu chu rual ṭha a nit.

²⁷Loima nen rifûk diam a, ni khâtin vângsak thei tâng ni ti iti ni riat infel mâkah chu dông tum no roh.

²⁸A bi dik tak om loiin ni bungtualbôm chungchângah thuretu ni non la, ni bâi khomin lêmna thu ril no roh.

²⁹“Ki chunga a tho lam angkan a chungah thông ki ti; a sualna chu lei thung rong,” ti no roh.

³⁰Mi thaboi loiah ki fe a, riatna nei ino mi rikulah ki lôn vêl a.

³¹Ringai ta, riling bukin a sip zit a, loi bang a ṭul uak a. Arkul idâihei khom a chim rem rum a.

³²Khahei kha ki en a, iṭha takkan ki ngaitua a, riseina ṭha tak a nen mu suaka ke pom tâk a.

³³Ni nuamin chu isîng viat inla, in viat roh. Kut kuangrikuan ringam viat ta,

³⁴ni in kârin inriangna khan inru angkan nang man a ta, risamnan sipai angkan nang hong de thut an ti.