Read Biete THUVÂRHEI 25 Bible Online

THUVÂRHEI 25 - Biete bible

THUVÂRHEI 25

¹Hihei khom hi Solomona thuvâr, Juda rêng Hezekia roirêlna muna ziaktuhei irziak nôk chu a nit.

²Thil rithup hi Pathian roinpuina a nit a; rênghei roinpuina chu thil izong suak hi a nit.

³Rêng khan im ai ngaitua reh thei tlak no tin e; a ngaituanahei chu rivân risâng angkan arsâng a, tuikhanglian inthûk angkan a înthûk a nit.

⁴Tangkaruaa rithokin a êk lah pai inla, ân luan ngaitun thil iṭha tak inluan thei a ti.

⁵Rêng makunga rithokin roisaktu ṭhano kha khâi pai inla, a rêngram chu diknan indet nîng a ti.

⁶Rêng makungah ni ngîrin nang inpâk rangin phût non la, mi lian khomin ribe no roh.

⁷Ni ṭhungmun kha mi lianhei iken roh an iti nêkan chu, “Ṭhungmun iṭha ualah hin hong iṭhung roh,” nang an iti chu a ṭhat ual.

⁸Thil ni mita nî muhei kha roirêl munah fepui zel no roh. Nakanah riatpuitu dangin ne diknona ân lang duaiin chu tho rang dan reh no tin e.

⁹Ni suapui neh thubuai nin neiin chu nin ruaikan isîr infel unla, îte thu rithuphei inlang no roh.

¹⁰A nit non chu mi tinin thu rithuphei ip thei mak cheh iti riang an ta, ner ming siatna chu boi khâi no nih.

¹¹Tum dân ifel taka sîr inlang hi rângkachak lûm tangkaruaa phûm angkah a nit.

¹²Thu ôi nuamtu ta rangin chu riatna rizat inei mihein riningna ṭong an ipêk kha rângkachak kutsabit neh rângkachak rithei nêkan khom a lut pêk ual.

¹³Palâi iamom chu â tirtu ta rangin inî lum lâi taka ivurtui idâiriam angkah a nit. Â tirtu ringna ân har ngai.

¹⁴Thil ipeh rang inkunga peh tlak ngai ino mihei chu rua pom ino sûm neh ithli angkah an nit.

¹⁵Tuangdiar takka ngênna hin nialna khir tak â khiak ngai. Ṭong rivuaiin roirêltuhei ilua ân kûk ngai.

¹⁶Khopinter rakkan khuaitui fah tlak no roh; a nit non chu ni ning mâk a ta; iluak nôk riai ni ti.

¹⁷Ni bungahei inah lêng intam rai no roh; a chang nang idongin nang chimchân a ti.

¹⁸Mahni bungahei milaka nôtu chu hêmtôk hei, khandai hei neh thal ingaih hei angkana thi theina a nit.

¹⁹Lungzîng lâia mi iamom ino rin chu ha nîng zit puma thil ikhâi neh ke kiak puma lôn angkah a nit.

²⁰Mi beindong zianga lâ sak chu rammual dâi nî sûna a puansil ilâi pêk neh a sabea chang-al[16] ibuak pêk angkah a nit.

²¹Ne râl a von a ṭâmin chu ifah rang pen la; a tui arhâlin chu tui iin rang peh roh.

²²Ani chu izakin a mâi inmôk pêk ni ta,[17] khanchu, PUMAPA khan loman nang pêng a ti.

²³Mâr ithlîn rua a zuang îthlun ngai angkah takin ridemna khomin ningthikna â thlun ngai.

²⁴Nupui rângisia neh in ihoi taka om nêkan chu dângdi nuaia om khom a ṭhat ual.

²⁵Ram ila taka rithoka thurchi ṭha ria chu tui rihâl dangchâr lâi taka tui idâiriam iin angkah a nit.

²⁶Mi ṭhano makunga mi dik ripelût chu tuikuang ilui tâk neh tuinâr rinok angkah a nit.

²⁷Khuaitui in intam rai ai ṭhat ino angkan mahni roinpuina rang ringot izong rai hi ṭha mak e.[18]

²⁸Mahni lungril isôi zoi thei ino mi chu khopui ichim kulpui nei khâi ino, irâlin an rûnna ranga ri-ong pam, beidong iom tak angkah a nit.