Read Biete THUVÂRHEI 26 Bible Online

THUVÂRHEI 26 - Biete bible

THUVÂRHEI 26

¹Fûra ivur iṭul neh bu ât zoroa ruasûr a irme no angkan intlo chôiinrisâng hi a irme no a nit.

²A bi boiin chu vânisâmna ṭonghei khan nang iseh thei no nih. Iva vuang diai omna indang ino angkah a nit.

³Lâidâng chu sakuartung rang a nit a, lâkam chu sakor rang a nit a, irol chu intlo ruang rang a nit.

⁴Ṭongridon chanlamboi ni sâmin chu ardontu angkana intlo nîng ni ti.

⁵Ṭongridon chanlamboi chu chanlamboiin sâm inla; khanchu, ardontu khan ivâra a irbe dôrkah chu vâr make iti hong riang a ti.

⁶Intlo thu richa chu mahni ke tan angkah a nit a; buaina nî tong ngêt rang a nit.

⁷Kebâihei ke a irtûl ṭian ngai angkan thuvâr khom hih intlo bâiah chu a nit ngai.

⁸Intlo inpâk chu sâiliphana sâilûm ithlung khap angkah a nit.

⁹Intlo, thuvâr imang chu zûnrui a kuta riling ikêl itum angkah a nit.

¹⁰Intlo rivâk vêl neh zûnrui sin intho ranga mangtu chu ai mu murdi phela kâp iphop ngaitu angkah a nit.

¹¹Intlo khan intlo sin a tho nôkin chu ui â luak ifah nôk ngai angkah a nit.

¹²Vâr loia ivâr rititu nêkan chu intlo phakchit a ṭhat ual.

¹³Ithôm mi thaboi kha pu a pêt tlak ngai no? Im ai ṭi? Sakeibaknei mani?

¹⁴Kopzaah inkhâr a irhêm diai ngai angkan mi thaboi khom a zâlmunah arhêl diai ngai.

¹⁵Mi thaboi khan bukhêng â pûr ṭian a; a bâia bu hang ithun tak khom a ngîk ngai.

¹⁶Mi sarikah thil isût ithiamhei nêkan khom mi thaboi chu ama ringaiin ivâr ualin arbe ngai.

¹⁷A vân rolna rang ni viat loia mi rikhalna va ṭang chu lampuia fe a, ui ilôn â kuara man angkah a nit.

¹⁸“Mi a bungtualbôm ilêm a,” nungah chu “Ki thuzer im ki ta,” titu chu invêt, thingthu ringhei, thalhei, thi theina mangruaheia ridâi angkah a nit.

²⁰Thing a hekin chu mei khom a thi a; khaangkan risîr risak a omnonah chu ringo rikhal a mong ngai.

²¹Meiholin chu mei ân ri-al ngai a, thingin chu mei ân chok mai ngai; Khaangkan buaina siamtuhein chu risualna an inthuar mai ngai.

²²Mi sîr zizat ngaitu ṭong chu a thlum a, takpum sungrilah a lût ngai.

²³Lungril isuala mûr ithiam chu ipil bêl nâl inritle angkah a nit.

²⁴Vârriletin chu mi a nelna kha ṭongbâi ithlumin a thup ngai.

²⁵Thu ṭha okin ilang khom seh iam no roh. A lungril chu nelna sip a nit.

²⁶A nelna chu lêmnan thup thei man sela, a siatna chu vântlâng riatah inlang la nîng a ti.

²⁷Tukhom mi dang iôkna rang châng ikamhei khan anmani iôk an ti. Tukhom lung inlumkan amah dêng inrinôi a ti.

²⁸Milaka mi denginthei inuamtuhei kha ni nel rang a nit. Ṭong chanlamboiin chu siatna bang â thlun ngai.