Read Biete THUVÂRHEI 27 Bible Online

THUVÂRHEI 27 - Biete bible

THUVÂRHEI 27

¹Naktûka thil hong iom rang song no roh. Kha nikhua khan im a hong ithlun rang reh mak cheh.

²Nangmah neh nangmah ripâk tlak loiin mi dangin nang inpâk riseh; a nit, khualmihein nang inpâk riseh.

³Lung neh ṭiaizit hi a rik ok a; nikhomsela, intlon mi an înbuai neh inrichakin chu îte ni mak e.

⁴Ningmur chu a nun a terin a siat a; nikhomseh narsana neh inrichakin chu îte ni mak e.

⁵Nî uksak viat ino angkana ai be rang nêkan chu â langa nî rila nî ngo a ṭhat ual.

⁶Rualin chu nang ân nat duai le khom a ṭhat; khanniseh, ner doipuiin nang a kuan chu ridîn ta roh.

⁷Mi khop rangin chu khuaitui khom ningmâk iom tak a nit a, mi voniṭâm ta rangin chu thil ikhâ tinrêng khom a tui ngai.

⁸Mahni insung ngaisak ino chu iva arbu op inlum ino angkah a nit.

⁹Siriak namhoi neh namhoi dang danghein ni lungril inlôm a ta, buaina rêkin chu ni lungril idamriam ikhoi a ti.

¹⁰Nangma rual ṭhahei neh ni pa rual ṭhahei ringil tlak no roh. Ni vânduai nî-ah khan nang iṭangpui rangin nen zirpui mun danga om inah fe no roh; ram ilah vita om nen zirpui nêkan chu ni kôla ni bungtualbômhein nang san thei ual an ti.

¹¹Ki nai, vâr inla; khanchu, ki râifân a ta, ne sîrinseh ngaituhei sâmna rang nei ki ti.

¹²Mi vârin chu buaina hong itlung rang a lei mua arbîk ngai a, mi inmôl rêk chu ithleng thalin a tong a, inkhôk a sikpui ngai.

¹³Tukhom khualmi[19] lâkai chunga mopêl ranga ṭonginkungtu chu ama neinun ngêi khom siakhama tung pêk riai inrup a nit.

¹⁴Zînga thoia ṭhatvurna ṭong iring taka a rual ithoi chu vânisâmna angkana ringai thei a nit.

¹⁵Nupui rângisia chu ruachîn nî sûna rua sûr chur chur angkah a nit.

¹⁶Kha angkana nu kha ingkam nen dâirek thei ranga? Phâivua râng inringam itum neh siriak kutphaa fûn itum angkah a nit.

¹⁷Thîr chu thîr ngirin a înngaih ngai angkan mihei khom mi dang ata an risei risak ngai.

¹⁸Theichâng kung donsui inla, â râ ifah rang nei ni ti. Suak khom a pu donsui chu chôiinrisângin om a ti.

¹⁹Tuiah mahni mêl a îlang ngai angkan miriam lungril chu miriamah â lang ngai.

²⁰Miriam rizukna chu thlânbâi inruak[20] angkah a nit a, inrup tok zel nei ngai mak e.

²¹Meiin rângkachak neh tangkarua a fia a; miriam khom mihei inpâk dâna rithokin ifia thei a nit.

²²Intlo chu ithi lôkkan hêm khom inla, ân tlôkna chu hêm inboi pêk thei no tin e.

²³Ni berahei neh ni ranhei theidôra enkolin donsui roh.

²⁴Richon hi kumkhua dai rang ni mak a, rênglukhum khom hi suanpâr murdi tena dai rang ni mak e.

²⁵Bupôl ât inla; khanungchu, bu a hong vâng nôk mâkah loisûl rinoi kha itlângheiah khan ât ngai roh.

²⁶Ni bera mulheia rithokin puanhei siam ni ta, ni kêlhei manah khan loimun richoh thei ni ti.

²⁷Nin fâk khop rang kêl dûthei om a ta, nin insungkua fâk rang, ne som nungâkhei fâk khop rang khom om a ti.