Read Biete THUVÂRHEI 28 Bible Online

THUVÂRHEI 28 - Biete bible

THUVÂRHEI 28

¹Mi siahei chu tutên rizûl loiin lâizâm an tho ngai a, mi felhei chu keipui angkan an ihâi ngai.

²Ramin a thonsualin chu ruaitu an rithleng zung zung ngai a. Ruaitu, riatna nei neh riatthiamna nei an omin chu ram â ding indet sôt ngai.

³Rêng isual, inrianghei nuam ilo ngaitu chu chimu tinrêng isian rimang riai ngai rua sângsari angkah a nit.

⁴Dân ngaisak ino mihein chu mi siahei an san ngai a; dân izômtuhein chu an doi ngai.

⁵Mi ṭhanohei khan dikna rethiam ngai mak a, PUMAPA chubai iûntuhei bangin an riatthiam ngai.

⁶Richonga omdân dikinoa om nêkan chu inriang fapka omdân idik taka om chu a ṭhat ual.

⁷Dân izôm ngai vânglâi chu mi vâr a nit a; tukhom nuam ninga om ngaihei ruala siam chu a pa mualphoina â thlun ngai.

⁸A pung rizûl neh mihei riamchâna neia richong a nitin chu inriang lunginkham ngaituhei ta ranga richon ibûm pêk a nit.

⁹Dân zôm nuam inotu chu a ṭongṭaina khom itiriom a nit.

¹⁰Mi ṭha sual insin ranga lam dikinoa ṭhui inrimangtu chu mahni châng kam nâk nâkah iôk a ti. Mi ṭhahei khan chu thil iṭha dong an ti.

¹¹Richonghei chu ivârin an ribe ngai a; nikhomseh, inriang riatnan thûk inei rêkin chu a thlît vang ngai.

¹²Mi ṭhahei thuneina an hong silin chu mi tinrêng an lôm ngai a, mi siahei an inlalin chu mihei an ribîk khap ngai.

¹³An siatna thuphei chu thluantlung ngai mak e. Ip loia inpuanga rilettuhei chu Pathian lungkhamna dong an ti.

¹⁴PUMAPA thu zôm mai mi chu an ham a ṭhat e. A tuklul inlian ngaitu chu rimang a ti.

¹⁵Ruaitu siahei kutah chu inrianghei hi mi riangvâi tak tak an nit ngai; anni kha sakeibaknei irung neh ivom ihuk rivâk ruai ruai angkana inrît an nit.

¹⁶Ruaitu, riatna nei ino chu ruaitu nunter nîng a ti. Diknona neltu chu inlal sôt a ti.

¹⁷Mi thattu chu ama thlân, â rang thei dôra rimota choih a nit. Tutên san no nih.

¹⁸Idik inla, sanisuan om ni ti. Ne dik non chu ilîr zel ni ti.

¹⁹Takritâi takka sin itho mi khan ifah rang nei intam a ta; chanlamboia zoron hek ngai mihei chu inriang mai an ti.

²⁰Mi dikhei chu râifân neh ringum takkan ring an ta, richong ringot ituma rimothei chu kuttum tong loiin suak no nih.

²¹Thleibîk inei hi idik mak e. Roirêltu ṭhenkah chu ichînteka thilpêk inrûk muna rang sika thil thonsual nuam an om ngai.

²²Mi tiksiahein chu richon an rizûla an chungah risamna a hong tlung rang reh phâk ngai mak e.

²³Bâi banga mi inpâk ngaitu nêkan chu minriseitu chu nungah inpâk a lo tam ual ngai.

²⁴Tukhom a nu neh a pa neinun iru pêk a, “Îte a siatna omak e,” ititu chu inru neh arlêmna omak e.

²⁵Kuatinkamtu khan buaina bang â sua ngai a; PUMAPA iamtu chu ṭhativurin om a ti.

²⁶Mahni ringai dân bang izuitu chu intlo a nit a; mi vârhei inriseina zuitu chu izôkriamkan om a ti.

²⁷Inrianghei ṭangpuitu chu risam tlak no nih. Inrianghei tianga mit isîng khaptu chu mi tin vânisâm dong a ti.

²⁸Mi siahei an inlalin chu mihei an ribîk ngai a. An ilîr tenan chu mi felhei an inlal nôk ngai.