Read Biete THUVÂRHEI 29 Bible Online

THUVÂRHEI 29 - Biete bible

THUVÂRHEI 29

¹Mîn an ril intam dôrkah a tuklul inlian chu voikah zelin la lîr a ta, thoinôk thei tlak khâi no nih.

²Ruaitu fel an omin chu mihei an lôm a, ruaitu sia omna rêk chu mihei ṭap irungin an om ngai.

³Vârna ringaiinna mi khan a pa inlôm a ti. Nochizuar chunga a sum inhek ngai mi chu inriang a ti.

⁴Idik takkan rêngin roi a rêlin chu ram â ding insôt ngai a, fâkinrûk a lâkin chu ram a siat ngai.

⁵A rualhei sâidâr inpâk itho ngai chu ama ôkna ranga châng ikam a nit.

⁶Mi felhei zalen tak neh râiifân takka an om lâiin mi ṭhanohei chu an siatna ngêiah khan an ripal ngai.

⁷Mi fel khan inrianghei chungrichân thu a riatpui a, mi siahei rêkin chu kha thilhei riatthiamna nei ngai mak e.

⁸Mi dang maritna nei ino mihein chu khopui an inbuai chit ngai a, mi vârhein chu ningthikna an inrikiang ngai.

⁹Mi vârin intlo arkhalpuiin chu intlo kha â nui a, a om êsêl ân lian ual ual ngai a; ringeina rêng rêng om thei ngai mak e.

¹⁰Thisen isua ranga rihâl mihei khan mi dikhei an nel ngai a, mi felhei rêkin chu mi dikhei ringna an inzôk ngai.

¹¹Intlo khan chu a ningthik ân lang suak ngai a, mi vârhei rêkin chu an ilung an iṭhuai zâm a, an dâirek ngai.

¹²Ram ruaitun milak thu arngaiinnatin chu a sinthotuhei murdi an isual ngai.

¹³Inriang neh mi nuaisiatu ri-angna tak chu PUMAPA khan mitvârna ai pêk seng seng an nit.

¹⁴Inrianghei idik taka roiirêl pêktu rêng chu kumkhuakan inlal a ti.

¹⁵Isôina neh rilna hi naipanghei rangin a ṭhat. Ama nuam dânin a omin chu a nu mâimôk sak a ti.

¹⁶Mi siahei an inlalin chu siatna a pung ngai a. Mi fel khan chu kha angkana mihei ilîrna kha mûng a ti.

¹⁷Ni naihei isôi inla, lungringamna nang pêng an ti. A nit, ni lungril lômna nang ithlun pêk an ti.

¹⁸Pathian îruai ino nam chu rimangna tiang an pan ngai. Pathian dân izômtu chu mi hamṭha a nit.

¹⁹Suak chu ṭongbâi banga isôi thei mi ni mak. Reh man sela ngaisak no nih.

²⁰Mi ngaitua loia ṭong sêtsuat ngai nêkan chu intlo chit chu isabei rang a om ual.

²¹A naipangtea rithokin ni suak kha ne duamin chu a nungkhônah chu ner chon khom nang a la irchupui rang a nit.

²²Ningithik zel zel ngai mihein ringona neh buaina tam takkah an isua ngai.

²³Mi a lârripâknan tlômna ithlun a ta, mi lungril ngaiintlôm rêk chu chôiinrisângin om a ti.

²⁴Inru rithloppuitu chu ama ringna ai nel a nit. Roirêlna munah thudik â sîrin chu ihêm tong a ta, thudik â sîr non chu Pathianin vâni sâm a ti.

²⁵Mi dang ringai dân iuksak rai hi ân rît a, PUMAPAA ringat rêk chu zôkriam a ti.

²⁶Mi tam takkan roirêltuhei ditsak dongna an zong ngai a, miriam chunga roirêlna dik chu PUMAPA zianga rithoka suak a nit.

²⁷Mi siahei chu mi felhei rangin itiriom an nit a, mi felhei khom mi siahei rangin itiriom an nit.