Read Biete THUVÂRHEI 3 Bible Online

THUVÂRHEI 3 - Biete bible

THUVÂRHEI 3

¹Ki nai, nang ki înriseihei ringil tlak non la, ni lungrilah ki thupêkhei vong ngit roh.

²Khanchu, ring dam sôtna neh thluantlungnahei nang pêng a ti.

³Iamomna neh lungkhamna kha ithla tlak non la, ni lungril phêkah riziak roh.

⁴Khanchu, Pathian neh miriam mit itlungin hong om ni ti.

⁵Ni lungril murdin PUMAPA iam inla, nangma riatnaah ringat no roh.

⁶Ni sintho murdiah PUMAPA remai inla, aman lampui dik nang inmu mai a ti.

⁷Nangma ringaiin ivârin ribe non la, PUMAPA thu bang zôm inla, sual nungsong roh.

⁸Khanchu, ni taksa rangin risêlna nîng a ta, ni ru rangin rithling nîng a ti.

⁹Ni sum neh ni thil invâng â ṭhatakheiah khan PUMAPA chu chôiinrisâng roh.

¹⁰Khanchu, ni fasiar kha buhein hong sip a ta, ni sômkhurhei uain itharin luang liam a ti.

¹¹Ki naipa, PUMAPA nang isôina kha ngainêp non la, nang a ngona kha ridînna ṭongin be roh.

¹²PUMAPA khan lung ai thlunghei chu â sôi ngai a, pân nai ai lômhei a îsôi ngai angkah hin.

¹³Mi vâr hong ini a, riatthiamna nei inrizat mi chu a ham a ṭhat e.

¹⁴Tangkarua nei nêkan a lut ual a; rângkachak nêkan khom ai lut ual a nit.

¹⁵Vârna chu lungilu nêkan khom a lut ual a, thil ni dit rithlang murdihei khomin hen thei no nih.

¹⁶Vârna khan dam sôtna nang pêng a ta; khabanah, richon neh roinpuina khom nang insil a ti.

¹⁷Vârna khan ni lungril chu ringkhohoiin siam a ta, thlangamnan nang ṭhui a ti.

¹⁸Mi vârhei chu an ham a ṭhat e, vârna khan ringna pêng a ti.

¹⁹PUMAPA khan vârnan rinêng hi a siam a; riatnan rivân khi a om munah ai sia a nit.

²⁰Ama vârna khan tuidung ân luang a, sûm khan rinêngah rua ân sûr ngai.

²¹Ki nai, vârna neh ngaitua thiamna kha vong ngit inla, ni zianga rithoka rikiang rangin phal tlak no roh.

²²Ringna nang pêng a ta, a nit, vângsakna neh râifânna ringnun nang pêng a ti.

²³Khanchu, ni lampuiah idam riamkan lôn ni ta, ibâ tlak no tin e.

²⁴Ni zâl tikin ṭi no tin a; a nit, zâl ni ta, zân thluanin itui takkan in thlar ni ti.

²⁵Intukvakka siatna hong iomheiah khom ne lung sôl no ni a, mi siahei chungah phâivosimpui angkan ramna a hong tlung khomin ṭi no tin e.

²⁶PUMAPA khan nang ihoi a ta, ani khan chânga ôk rang nang phal no nih.

²⁷Tiklâi khomin ni thei ngânin chu ṭangpui ringaihei chungah sin iṭha sin mai roh.

²⁸Ni bungtualbôm ziangah iṭangpui thei chakkan naktûk inngâk tlak no roh.

²⁹Ni bungtualbôm chungah îte thil ṭhano phan no roh; ibei irkan ni kôlah ai om kêng ai nit.

³⁰Ni chungah îte a thonchâi non chu chanlamboiin mi tute ringopui no roh.

³¹Mi nunterhei rizuk non la, an omdâna om khom tum no roh.

³²PUMAPA khan sual isin mihei kha a nel ngai a, mi felhei chu iam inrupin a be ngai.

³³PUMAPA khan mi siahei inah chu vânisalna a sia a; nikhomsela, mi felhei in chu ṭhat a vur ngai.

³⁴Mi lârripâkhei chu a musit ngai a, ringai intlômhei chu dikna a pêk ngai.

³⁵Mi vârhei khan roinpuina dong an ta, intlohei chu mualphoina bang sik an ti.