Read Biete THUVÂRHEI 30 Bible Online

THUVÂRHEI 30 - Biete bible

THUVÂRHEI 30

¹Jakea naipa Agura[21] thuhei chu hihei hih a nit: “Pathian chu ki ziangah om khâi mak, Pathian ki ziangah om khai mak a,[22] îte tho thei khâi mang e.

²A miriam lâia sa angkah ki nit a; Miriamin riatthiamna an inei hi nei khâi mang e.

³Vârna lei risei mang a, Pathian riatna khom îte nei mang e.

⁴Tûm rivâna lui tâka zuang iṭum nôk? Tûm a kuta phâivua fûn thei? Tûm puanleka tui ifûn thei? Tûm rinêng kôlkomong ramrî â rît? Tûm ai nit? Tûm a naipa khom ai nit ni riat im?

⁵“PUMAPA thu chu thudik a nit iti ifia a nit tâk. Ama zongtu murdihei rangin ani chu ipho a nit.

⁶A ṭonghei chu bôksa no roh, a nit non chu nang ngo a ta, milak ni nit iti inlang a ti.”

⁷O Pathian, thil inikah nang ki ngên, ki thi man nen nei ngêt roh:

⁸Milaknaa rithokin ne sunghual inla, richongna manih, inriangna manih ne pe no roh. Ki rupbak kan ifâk ne peh roh.

⁹Khanonchu, ki nei tam rai khomin nang ki phial lôiin. A nit nole ken riang rai khomin mi ta ke rûkin, ki Pathian mualphoi ki sak duai lôiin.

¹⁰Suak kha a pu makungah dem no roh. Vâni nang sâm a ta, ni tuang duai lôiin.

¹¹Mi ṭhenkah an pahei vâni sâm a, an nuhei ngaisak ino an om a.

¹²Mi ṭhenkah anmani ringaiin rithiang an riti a, an inim thei dôra nim an om.

¹³Mi ṭhenkah anmani ringaia iṭha oka ribe an om a; O, idôra ṭhan im an irbe tak na!

¹⁴Mi ṭhenkah chu inrianghei ifahna rangin an hâhei chu khandai angkah a nit a, risamhei khâiinchipna rang an hapuihei chu chemte angkana ngaih a nit.

¹⁵“Ne peh roh, ne peh roh,” itia khêk nai nupang inikah rivotin a nei a. Thil ilikah “Khop tâk,” zel nei ino an om:

¹⁶Thlânbâi inruak, Nupang iching, Tui muno rinêng ichâr neh, Mei ichok vung vung an nit.

¹⁷A pa musittu neh a nu êrotu mit chu phâi vaâkin ikhel suak an ta, vasatelhein fâng an ti.

¹⁸Ki riat thei tlak ino thil rikhêl ilikah an om:

¹⁹Vânlâizôla mupui lam, Lungpharpha chunga irûl lam, Tuikhangliana rikuang lam neh, Ipa neh nupang lungrithlung lamhei a nit.

²⁰Khaangkan a nit, nupang inrê ngai lampui khom khah: a fâk a, a mûr a rûk vang a, “Thil isual îte tho mang,” a ti ngai.

²¹Thil ilikah rinêng ilua khomin ai tuang zoi thei ino a om:

²²Suak kha rêng a hong changin,[23] Intlo a hong richongin,

²³Nupang nunisia pasal a hong neiin neh, Suak nupang a pi mun a hong thûlin.

²⁴Mîring ichînte te ilikah rinêng chungah hin an om a, nikhomsela, vâr titaka vâr an nit:

²⁵Sangîrhei hih rât i no tak an nit a, Nikhomseh, an fâk rang kholum lâiin an bûm vang ngai.

²⁶Zupuihei khom hih rât i no tak an nit a, Nikhomseh, lungpuiheiah an omna an siam ngai.

²⁷Ikhâihei hin rêng nei mak a, Nikhomseh, a lômin an lôn ngai.

²⁸In-ôthei hih kutṭima man rip thei a nit a, Nikhomseh, rêng inah an om ngai.

²⁹Thil ilikah an lôn dân neh an omdâna roinpui enihoi an om:

³⁰Sakeibaknei, ramsa lâia a râttak, îten lâizâm an întho thei ino;

³¹A lôm lâia kêlchal; Ârkhong ilôn duai duai neh, Rênghei an mipuihei makunga lôn hi a nit.

³²Intlo takka ni lei irpâk tâk manih, a nit nole thil ṭhano ni lei ingaitua tâk manih a nitin chu ni bâi hup inla, dâirek roh.

³³Dût iôtin riaklûm a îsua a, nârdon richûmin nârthi a îsua ngai angkan, ningthik inthuarin chu risualna â sua ngai.