Read Biete THUVÂRHEI 31 Bible Online

THUVÂRHEI 31 - Biete bible

THUVÂRHEI 31

¹Rêng Lemuela[24] zianga a nu inriseina ṭong thuvârhei chu a nit:

²“Ki naipa, O ke rila râ, ki ṭonginkung nai, ringai ta.

³Rênghei iseh ngai nupang isual ziangah ni râtna hi peh no roh.

⁴O Lemuel, ringai roh. Rêngin chu zu a in rang ni tlak mak e. Roirêltuhein rakzu an zong rang ni mak.

⁵An inin chu dân ringil an ta, dengintheihei chungah roirêl dik mang thei no nih.

⁶Zu chu mi beindonghei neh armang ṭianhei rang a nit.

⁷In sela, an inriangna neh an beidongna ringil riseh.

⁸“Mi mahni ta ranga mûrbâi nei thei inohei rangin ṭong inla, ṭangpui ringaihei chungchâng thuheiah khan ṭong roh.

⁹An ta rangin ṭong inla, ifel takkan roirêl roh. Inriang neh risamhei chungah idik takkan roirêl roh.”

¹⁰Nupui ifel tûm a mu thei rang? Lungilu tam takka nêkan khom a lut ual.

¹¹A pasal lungril khan a iam zoi a, risamna rêng rêng nei no nih.

¹²A damsung kârkah a pasal rangin siatna tiang ni loiin ṭhatna tiang korong sin a tho pêk ngai a.

¹³Samul neh pat hei a zong a, ritha fân takkan a kutin a sin ngai a.

¹⁴Rivai mi rikuang angkah a nit a, ram ilah taka rithokin ifarua a hong ichôi ngai angkan ifarua a bûm ngai a.

¹⁵Ârkhuanah a thoi a, a insung mihei rang thlâi a sin a; â som nupanghei ziangah an sin rang â ril ngai a.

¹⁶Loima rang a ngaitua a, archôk a; khanchu, a kut ngêia a sum isuaah khan grep rikul a siam ngai a.

¹⁷Takritâi takkan sin a tho a, a kuthei ân rât ngai a.

¹⁸Ama thilsiamhei lut tlia a riat a, zân rife rak rakkan sin a tho ngai a.

¹⁹Ama kut ngêiin rimuiheiin pat a kher a, puanhei a không ngai a.

²⁰Inrianghei tiang a tik ân thlâi a; a nit, ṭangpui ringaihei tiang a kut arsam ngai.

²¹A inmihei rangin phalbi ṭipui ngai mak a, a inmihei murdi puan ilum ân sil chit ngai a.

²²Puantha rikhû enihoi tak a siam a, a silbom chu puanzâi rimi neh puan senduk a nit.

²³A pasal chu mipui bualah ramtlâng ulianhei neh an iṭhung lâi khomin mi miriat tak a nit ngai a.

²⁴Puan iṭhahein silbom neh kongkhithei a siam a, rivai mihei ziangah a zuar ngai a.

²⁵Arvôna chu râtna neh roinpuina a nit a, sûn matianga la hong itlung rang khom ṭi ngai mak e.

²⁶Lungril rivuai takkan vârnan a ṭong suak ngai a.

²⁷An insung vângsak dân a en inṭhat a, artha rêng rêng inboi ngai mak e.

²⁸A naihein an ringaiinnat tlia an inlang a, a pasal khomin ân pâk ngai a.

²⁹“Nupang itam takkah nupui iṭha an om a; nikhomseh, nangma dôra ṭha chu omak e,” a ti ngai.

³⁰Dit omna hi lêmna a nit a, mêl ṭhatna khom hi chanlamboi a nit; PUMAPA ṭitu nupang rêk chu inpâkin om a ti.

³¹A kut sin irâ chu pen la, a sintho sikah khan mi tin tinin marit tho riseh.