Read Biete THUVÂRHEI 4 Bible Online

THUVÂRHEI 4 - Biete bible

THUVÂRHEI 4

¹Ki naihei, nin pa nangni inriseina chu ringai rei. Nin ikuar sung unla, riatthiamna hong nei nin ti.

²Inriseina ṭha tak nangni kî pêk a nit; khasikin, an rêngkan vong ngit rei.

³Nai khât ki nit a, ki chîn lâiah khan nai en ol ki nit a,

⁴Ki pân a nen risei a, hingkan a ti ngai, “Ki thuhei hi remai inla, ringil tlak no roh. Ki thupêkhei angkan om inla; khanchu, ring ni ti.

⁵Vârna neh riatthiamna nei inla; ki thupêkhei ringil non la, uksak loi khomin om no roh.

⁶Vârna nungsong non la; khanchu, nang ihoi a ti; lungthlung inla, nang sunghual a ti.

⁷Vârna hih thupui takka ni nei rang a nit. Ni thil nei murdi ichân khomin riatthiamna nei roh.

⁸Vârna hih lungthlung inla, nang chôiinrisâng a ti. Inlun la, mânlianna nang ithlun pêk a ti.

⁹Nangma rangin roinpuina rênglukhum ning a ti.”

¹⁰Ki nai, ki tiang ne kuar sung roh. Ki thupêkhei ipom inla; khanchu, ni dam sôt a ti.

¹¹Vârna nang ken risei a, ṭhatna lamah nang ki îruai a nit.

¹²Ivâr takkan ni lônin chu lampuiah îtên nang idan no ni a, ne tlân khomin ibâ no tin e.

¹³Ni irsei murdi remai inla, ni thiamna khah ni ringna a nit a, vong ngit roh.

¹⁴Mi sualhei lampuiah khan fe non la, mi sualhei nunchan khom zui no roh.

¹⁵Tho no roh; siatna ata rikiang roh. Nungsong inla, ni lampuiah fe thal thal roh.

¹⁶Mi siahei chu isia an sin no zelin chu in thei ngai mak e. Tuhei siatna rang mani lua an ithlun pêk non chu an in rimu inik thei ngai mak.

¹⁷Siatna neh nunterna khah an ta rangin chu bu neh uain angkah a nit.

¹⁸Mi felhei lampui chu zîng inî suak, sûnlâi tak a nit mâka hong ivar tîr tîr ngai angkah a nit.

¹⁹Mi siahei lampui chu zân angkan a zîng a, an ibâ a, im an irsui mu ngai mak e.

²⁰Ki nai, ki ṭong ringai inla, ki thusîrah ne kuar sung roh.

²¹Ni zianga rithoka rikiang rang phal tlak non la, ni lungrilah remai inla, vong ngit roh.

²²Â rethiamhei rangin chu ringna a nit a, a taksa murdi rangin damna a nit ngai.

²³Thil dang nêkan ni lungril vênginṭha roh; ringna hong suakna kêng ai nit.

²⁴Milak tho tlak non la, ṭong chanlamboi ril no roh.

²⁵Sabeina dik tak ineiin matiang thlîr inla; mualphoina tiang ngat no roh.

²⁶Ni sin rang chu iṭha takkan ngaitua bak inla; khanchu, ni sinna murdi hong inṭum a ti.

²⁷Sualna nungsong inla, itlûn takkan matiang lôn roh. Lampui dika rithokin voitiang manih, changtiang manih pêt tlak no roh.