Read Biete THUVÂRHEI 6 Bible Online

THUVÂRHEI 6 - Biete bible

THUVÂRHEI 6

¹Ki nai, mi dang lâkai chungah mophurtu rangin ṭong ni înkung mani?

²Ni ṭong ngêiin nang a man a; ni ṭonginkung ngêiah ni î-ôk tâk mani?

³Khaangkan a nitin chu, ki nai, kha mi thuneina nuaiah nî om a nit iti reh roh. Nikhomsela, hingkan suak rang dân chu a nit: a ziangah fe zel inla, nang isua rangin ngên roh.

⁴Inrimu bûk non la, ringam ṭian no roh.

⁵Sa kâptu kuta rithoka sakhi a îtlân pat ngai angkan neh châng idotu kuta rithoka iva ai vuang suak pat ngai angkan suak pat roh.

⁶Mi thaboihei khan sangîr ringdâna rithokin risei riseh.

⁷Anni khan rênghei, ruaituhei, roirêltuhei nei mak a;

⁸nikhomsela, fûr lâiin ifarua an bûm a, ṭhâl tika rang an buk thlâm ngai.

⁹O mi thaboi, itena sôt im nî zâl ṭian rang? Tikin im nî thoi rang?

¹⁰“La hang isîng viat rong; kut kuangrikuan itôi tekah la hang ringam rong,” a ti ngai.

¹¹Nikhomsela, a in kârin inriangna khan inru râlthluka rivo angkan hong irok a ti.

¹²Mi mangmunboi, mi siahei chu milak ithon an rivâk vêl ngai.

¹³Nang an lêm theina rangin an mitin an risôn a, an kutin richikna an siam ngai.

¹⁴Tiklâi khomin an lungril porinche takheiah khan thil isual an ngaitua mai a, mun tinah buaina an siam ngai.

¹⁵Khasikin, tukvakkan siatnan del thut a ta, anni chu natinsat takkan popliam an ti.

¹⁶PUMAPA khan thil sarikah nel tak taka ai nel neh a irngai thiam thei tlak ino a om: Lârripâk hei, Milak ilei hei, Mi ningsiat sin ino thisen isuana kut hei, Thil ṭhano ngaitua ngai lungril hei, Sual isin ranga kal inrât ngai ke hei, Riatpuitu lem milak chikinrichuan ngai hei, Rual lâia buaina siam ngai hei.

²⁰Ki naipa, ni pa thupêkhei zôm inla, ni nu nang inriseina ringil tlak no roh.

²¹An ṭong tihei vong mai inla, ni lungrilah rê roh.

²²An inriseina khan nen zin vêlnaah nang iruai a ta, zânah nang rung a ta, sûnah roi nang sakpui a ti.

²³An thupêkhei chu meiser ivâr a nit a; an rilna khan ringna lam nang inmûng a ti.

²⁴Nupang isuala rithokin neh mi dang nupuihei ṭong ithlum taka rithokin nang inzôk a ti.

²⁵An ṭhatnahei rizuk non la; an mit meng ipârsap khan nang in-ôk no riseh.

²⁶Nochizuar chu ibai thliamkah khomin richoh thei a nit a; nikhomsela, inrênan chu a ringna ten khom zong a ti.

²⁷Min a puan kâng loiin mei a îpom thei rang mani?

²⁸A ke kâng loiin mei ri-al chungah ai lôn thei rang mani?

²⁹Khaangkah khan mi dang nupui ichâipui chu tukhom tuang loiin suak no nih.

³⁰Vonṭâm sika ifarua rutu chu mihein musit ngai mak e.

³¹Nikhomsela, imanin a omin chu a bâk sarikan a tuak nôk ngêt rang a nit a, ai nei murdi a îchân vang rang a nit.

³²Mi nupui richupuitu khan riatna nei mak a. Amah neh amah a îsiat a nit iti reh ngai mak e.

³³Kuttum itongin mâimôkna sik a ta; mualinphoi takkan om mai tâng a ti.

³⁴Thîkna sika ningthik hih a nêka na om thei mak; phuba lâk nin chu îte zua no nih.

³⁵Tuakna sum iham no ni a; thilpêk itam takkah peh man inla, â lung tluk ual no nih.