Read Biete THUVÂRHEI 7 Bible Online

THUVÂRHEI 7 - Biete bible

THUVÂRHEI 7

¹Ki nai, ki thuhei remai inla, ki thupêkhei ringil tlak no roh.

²Ki thupêkhei zôm inla, iring idamin om ni ti. Ki dân chu ni mit lâilên ni îhoih dôra idînin vong roh.

³Nang ken riseina chu zoro tin ikol inla; ni lungril phêkah riziak roh.

⁴Vârna chu ni farnu angkan ben la; riatna kha ni rual lungthlung tak angkan be roh.

⁵Khanchu, mi dang nupuiheia rithokin neh nupang isualhei thlêmna rithokin nang inzôk a ti.

⁶Voikah chu ki tukvera rithokin ki hei thlîr a.

⁷Tlangvâl inmôl itam takkah ki mu a, an lâiah tlangvâl riatna risam bîk ki hei mu a.

⁸Nupang khatka omna bung ikil tianga lampuiah khan a fe a. A in kôlah a thleng a.

⁹Kholoi ni tlâk nung zân zîng bupah khan.

¹⁰Khante, nochizuar rivoa rivo neh vârrilet nupang khan artongpui a.

¹¹Nupang zak iboi neh tum inru, kil tina lôn vêl ngai,

¹²mun ikilheia ding a, lampuiheiah neh bazâr munheia mi ridîp vêl ngai a nit a.

¹³Khanchu, tlangvâl kha â kua a, â riam a, ingam takkan a en a, a ziangah,

¹⁴“Vuanah hin ringeina thillan ki lan a, ribôlna sahei ki fâk a.

¹⁵Khasikin, nangma tong rangin kî hong a nit. Nang imu ki nuam a, hin kêng ni lei iom na!

¹⁶Ki zâlmun chu Aigupta ram puan ṭial ker khû a.

¹⁷Ki puantha khom bero hei, aloe hei neh thîngthal hein â nam ken hoi a.

¹⁸Tho hong roh; zân thluanin lungthlungna pâr lei fîm rei. Ei iṭâng chunga ripom risakin lei lôm rei.

¹⁹Ki pasal lak inah omak a, khual ram ilah takah ân zin a.

²⁰Sum itam tôk takkah a chôi a, thla ritenka nung bangah kêng la hong kîr a ti,” a ti a.

²¹Khâmnu mêl ṭhatna khan â thlêm inlîr a, a riamna ṭong ithlum khan a ṭhui inrimang tâk a.

²²Voikah rengin a zui zel tâk a; sechal, a thatna mun tianga fe angkan neh sakhi, a lungmu tak â dôtna rang kar ipun tlit tlit angkan neh,

²³iva, a thina rang a nit iti reh loia lên ai pan ngai angkah a nit.

²⁴Khasikin, ki naipahei, atûnah hin ki thuhei ringai unla, ki bâia thu suakhei hi ipom rei.

²⁵Khangkana nupang kha nin lungril inê rangin phal no unla; a lampuiah khan fe rimang no rei.

²⁶Ipa itam takka siatna a nit a, tep zoi loihei thina bi tak a nit.

²⁷A inah ni fen chu mithi khua pan angkah ni nit. Mithi khua panna kôitan lam a nit.