Read Biete THUVÂRHEI 8 Bible Online

THUVÂRHEI 8 - Biete bible

THUVÂRHEI 8

¹Ringai ta! Vârna â khêk a, riatna khan tlâng a îsam a nit.

²Lamilian kôl tlâng risângheiah neh lamṭhuamheiah khan â ding a.

³Khopui dâikungheiah neh khua lûtna kotsuaheiah â pâi a:

⁴“O nangni manmasihei, nangni ki ngên; Rinênga mi tinrênghei kî koi a nit.

⁵Mi inmôlhei, vârna risei unla; Intlohei, riatna risei rei.

⁶Ki ṭong ti ṭha tak takhei hih ringai rei; Ki thusîr murdi hih â dik a nit.

⁷Ki bâia thu suak hih thutak a nit a; Milak thu chu ki rangin nel iom tak a nit.

⁸Ki bâia thu tinrêng hih â dik a nit; Thu dikino neh chanlamboi thu îte omak e.

⁹Riatthiamna nei mi rangin a fel riai a; Riatna nei rangin ân tlâi teng a nit.

¹⁰Tangkarua nêkan ken riseina[3] hih rithlang unla; Rângkachak ilu tak nêkan khom riatna hih rithlang rei.

¹¹Vârna ki nit a, lungilu sen nêkan khom ki lut ual a; Ni thil nuam rithlang thei murdi khomin inrihen thei phâk ni mang e.

¹²Vârna ki nit a, riatthiamna ki nei a, Riatna neh roirêl richamna ki nei.

¹³PUMAPA ṭi chu sual inel hih a nit. Ripâkna hei, risongna hei, sual lampui hei neh ṭong chanlamboi hei hih kî nel a nit.

¹⁴Thil ki ngaitua a, ki ngaituanahei ken ding ngai a. Riatthiamna ki nei a, irât tak ki nit.

¹⁵Rênghein roidik an rêlna rangin neh, Ruaituhein dân iṭha an siamna rangin ki ṭangpui ngai.

¹⁶Keima mangin ruaituhei murdîn rinêng chungah roi an rêl a, Mi lian neh mi roinpuihei khomin.

¹⁷Lung ne thlunghei chu lung ki thlung a; Takritâi takka ne zongtuhei kan ne mûng an ti.

¹⁸Ipeh rang richon neh roinpuina ki nei a, Vângsakna neh manchang suaknahei khom.

¹⁹Ki zianga rithoka nin imu chu rângkachak iṭhatak nêkan a ṭhat ual a, Tangkarua rithît infâi liai nêkan khom a ṭhat ual.

²⁰Felna lampuiah ki lôn a; Dikna lamhei ki zui a,

²¹Lung ne thlunghei richon ki pêk a, An inhei chu richon sumpuanin ken sip ngai.

²²PUMAPA khan thilsiam bul takah a ne nei a, Tianlâia a thilsiam bul takin.

²³A tîr taka ai siam ki nit a, Rammual a siam ma viaiah khan.

²⁴Tuikhanglian la om ma neh, Tuinârhei la om maah khan ki suak tâk a.

²⁵Itlânghei la om ma neh, Mualhei la om maah khan ki suak tâk a.

²⁶Pathianin leilung a lân ding ma neh ram a siam ma, Nêlipil kutkah khom a la om ma viaiah khan.

²⁷Rivânhei a siam lâiah khan ki om tâk a, Tuikhanglian ihual ranga kôlkil a rîn kual lâiah khan.

²⁸Sûmhei rivânah a sia lâi hei, Tuikhanglian nâr â ong lâi hei neh,

²⁹Tuipuia tuihei a ti ban rifôn loi ranga rî a khang pêk lâiah khan. Rinêng ringatna a phûm lâiah khan kî om tâk a nit.

³⁰Kha lâiah khan kutithiam mi [4] angkan a kôlah ki om a, Nîn tina lômna ki nit a, A kôlah râifân takkan ki om mai ngai.

³¹A rammual siamah râifân takkan ki lêng a, Miriam naihei chu kî lômna ngai a nit.

³²Tho rei, vânglâihei, ki thu ringai rei, Ki thupêk zôm unla nin ham ṭhâng a ti.

³³Inriseina nin idong kha ringai unla; Vâr unla, musit no rei.

³⁴Mi tukhom ki inkhâr bula om a, Ki dâikot bul ingâk a, Ki thu ringai chu a ham a ṭhat e.

³⁵Ne mutu chu ringna mu a nit a, PUMAPA ditsakna dong a ti.

³⁶Nikhomsela, ne mu notuhei[5] chu mahnia kuttum ritho nîng an ta; Tukhom ne nelhei chu thina lungithlung an nit.”