Read Biete THUVÂRHEI 9 Bible Online

THUVÂRHEI 9 - Biete bible

THUVÂRHEI 9

¹Vârna khan in a sin a, a chopui sarikah a phun a.

²Ruaiṭhena rangin a ranhei a that a, uain a nok a, khalai ân rifûk a.

³Khopui mun risângna taka ikhêk a, mi koi rangin a tirtôn nungâkhei a tir a,

⁴“Mi inmôlhei, tho hong rei,” an ti a. Khante, intlo ziangah khan,

⁵“Tho hong inla, ke bai hong fan la, ki uain inripol hong in roh.

⁶Mi inmôl lôm khah marak inla, ring roh. Khante, riatna lampui kha zui roh,” an ti a.

⁷Musit ngai mi ni rilin chu nang phengsan a ta, mi pualoi ni ngon chu kuttum kah tuang ni ti.

⁸Khasikin, musit ngai mi ril no roh; nang mumâk a ti. Nikhomsela, mi vâr ni rilin chu nang marit a ti.

⁹Mi vâr zianga ni thusîr murdi khan invâr ual a ta; mi fel zianga ni thuril murdi khan a riatna inribôk a ti.

¹⁰PUMAPA ṭi hih vârna bul a nit. Mi Rithianga ria hih riatthiamna dik a nit.

¹¹Vârna khan ni damsung kum inribôk a ti.

¹²Ni vârin chu nangma ta ranga vâr nîng ni ta, khan vârna ni nelin chu nangmah bang tuang ni ti.

¹³Intlôkna chu nupang zaksal, â om pipai angkah a nit.

¹⁴A kotbâiah â ṭhung ngai a, khuaa mun risângheiah â ṭhung a;

¹⁵mahni sintum chit ingaituaa thleng rilôi murdihei a lei koi a:

¹⁶“Mi inmôlhei, hin tiang hong rei,” a ti ngai a.

¹⁷Khante, mi riatna risamhei ziangah khan, “Irûk tui chu a thlum ual a, Irûk ibai khom â nik ual,” a ti a.

¹⁸Nikhomsela, anni khan khâmnu ina fe kah chu an thi a, a lei ilût tâk kah chu Seol khurah an om ngai iti reh viat mak e.