Read Biete THURILTU 1 Bible Online

THURILTU 1 - Biete bible

THURILTU 1

¹Hihei hih Jerusalem rêng, Davida naipa, Thuriltu thuhei chu a nit:

²Thuriltu khan, “Chanlamboi korong a nit, Thil tinrêng hih chanlamboi korong a nit,” a ti a.

³Miriam sinsôlna, nîsa nuaiah isôl takkan sin ei tho a, im rifena â om?

⁴Rikhûk khatkah an khum a, rikhûk dang an hong rithoi nôk a, rinêng laka hi chu a om ngaingirin a om mai a.

⁵Nîsa khom a hong suak mai a, a tlâk mai a, a suakna rang tiang ipanin a fe nôk zel ngai a.

⁶Ithli kha sim tiang isongin a râng a, mâr tiang isongin a hong râng nôk a, a râng kual, a râng kual a, a rângna ngaingirah khan a kîr nôk ngai a.

⁷Vadung murdihei kha tuikhanglianah an luang lût a; khanniseh, tuikhanglian kha sip ual mak a. Tuihei kha vadung nârah a kîr nôk a, a luangna ngaingirah ai luang nôk ngai a nit.

⁸Thil tinrêng hi ninghal iom tak a nit; isîr zoi zât ni mak e. Ei mit hih a thil muah khop ngai mak a; ei ikuar khom a thil riatah khop ngai mak e.

⁹Thil lei iom tâk ngai kha a hong iom nôk rang a nit a. Thil lei isin tâk kha isin nôk ai nit rang a nit. Inî nuaiah hin thil ithar rêng rêng omak e.

¹⁰Min, “En roh, amahih thil ithar a nit,” tîng an ta. Khannisela, ni mak e, ei om ma pialah khan a lei iom mai tâk ngai a nit.

¹¹Zoro thleng tâka thilhei tutên remai mak a, hi nungah khom atûn lâi thil hih remai ual no nih.

¹²Keimah, Thuriltu hi, Jerusalemah Israelhei rêng ki nit a.

¹³Vânkhup nuaia thil itho tâk murdi chungchâng kha vârna mangin ifia neh imu suak rangin ki lungril ki lei mang tâk a; Pathianin miriam naihei zianga ibuaipui ranga a lei ipêk hih sin râifân om ino tak a nit.

¹⁴Inî nuaia thil itho tak murdihei kha ki mu riai tâk a; ringai roh, chanlamboi korong a nit a; phâivua rizûl angkah a nit.

¹⁵Â kôi tâk khah siam intlûn thei no tin a; thil â om ino khah tep thei no tin e.

¹⁶Ki lungrilin, “Ki matona Jerusalema lei inlal tâk murdihei nêkan ki vâr ual ok a. Vârna neh riatna khom im ai nit ki riat riai tâk,” ki ti a.

¹⁷Ki lungril hih vârna neh intlôkna, riatna neh riatnona riphêrna ireh rang khomin ki lei mang tâk a. Khannisela, hi khom hih chanlamboi, phâivua rizûl angkah pai a nit iti ki riat tâk.

¹⁸Vârna arsâng dôrkah buaina a tam a, riatna a pung dôrkah lungzîngna ai pung ngai a nit.