Read Biete THURILTU 10 Bible Online

THURILTU 10 - Biete bible

THURILTU 10

¹Ithoi ithi khan riak namhoi ûm pumpui inam ân siat ngai a, khangkan invêtna chînte khan vârna neh maritomna kha a isiat ngai a nit.

²Mi vârin thil iṭha tho a, mi intlon thil dik ino tho hi a balam pial a nit.

³A nit, mi intlo kha tual a lêng lâiin a riatnan a phâk no sikin mi tin ziangah, “Ân tlo a nit,” iti a înlang ngai a nit.

⁴Thuneitu kha ni chungah a ning a thikin, mâkna lekha peh lût zel no roh; lung idâi riamkan ni omin chu thonsualna natinsat tak khom izâ thei a nit.

⁵Hi rammualah hin thil ṭha no tak kî riat chu roirêltun thil dik ino ai tho hi a nit.

⁶Mi invêthei dingmun risângah isia a, mi richonghei mun riniama inṭhung hi.

⁷Suakhei sakor chunga chuang ki mu a, mi lianhei kha suak angkana kea lôn khom kî mu a nit.

⁸Dîp ichoitu chu a dîp choiah ṭul a ta; Bang inêr thlengtu chu irûlin ichuk a ti.

⁹Lung suknaa sin ithotu chu lungin del a ta, thing isîrtu khan a thing sîrnaah pop a ti.

¹⁰Rei be a thlam a, mîn â tât inngaih non chu tharum a mang ual rang a nit. Lei ingaitua thlâm bak hih rifena ai om a nit.

¹¹A dôi maa irûlin â chuk bak tâkin chu irûl dôi ithiamin rifena omak.

¹²Mi vâr ṭongbâi suak kha ama rang roinpuina a nit a; khanniseh, mi intlon chu ama ṭongbâi suak ngêiin amah ân rimang ngai.

¹³Thu chanlamboi irilin a phut a, invêt ti tak nan a mong ngai.

¹⁴Mi intlo chu a ṭong sêt suat ngai. Mi tutên thil hong iom rang reh mak a, tutên thi nunga thil hong itlung rang khom ril thei mak.

¹⁵Mi a in lampui tak khom reh thei inoa intlohei bang kha sin ithon isôl neng kan an om ngai.

¹⁶Rêng kha tlangvâlte a nit a, ruaituhei kha zân tin zân thluanin ruai an iṭhen chu ram kha a buai ngai.

¹⁷Khannisela, rêng a khâta thuthlûkna siam thei neh ruaituhei khom inrui ngai ino, ridîn ithiam, a zoro dik thapa fâk izong ngai inei ram kha chu ram vânnei a nit.

¹⁸Mi ritha boi rai a inchung khom siam inṭha notu in chu rua zung a ta, a in khom ilîr a ti.

¹⁹Ruaiṭhe hin mi ân lôm a, uain khan mi ân fân ngai; khannisela, sum iboiin chu khahei khah itho thei ni mak.

²⁰Rêng kha idâirekkan khom vâni sâm no roh, mi richong kha ni khum lâizôlah khom vâni sâm no roh. Vate vuang man ṭong ai vuang ngai kêng ai nit.