Read Biete THURILTU 11 Bible Online

THURILTU 11 - Biete bible

THURILTU 11

¹Ni sum kha ram dangah inrivai inla, sûn itam takka nungah chu â pungin mu nôk ni ti.

²Mun sari, mun iriatka tah inrivai roh, rinêng chungah hin thil ṭhano im a hong itlung rang nî riat ino kêng a nit a.

³Thing kha taktiang isong khomin pûr sela, a pûrna tiang tak a îtâl rang a nit. Sûm kha tui a sipin chu rinêng chungah ai sûr ngai a nit.

⁴Khohoi vang ingâktu khan chi chôi no nia, îte khom invâng no nih.

⁵Nupang phûng sunga naite ringna hong thuar riphut dân nî riat ino angkan Pathian tinrêng isiamtu thiltho kha reh no tin e.

⁶Zîngah ni chi tun la, kholoiah khom ni kut inrizal no roh. Â thuar iṭha rang amah hîm, amah khâm, an rêngkan ri-ang natkan an ithuar rang im nî riat ino a nit.

⁷Ivâr kha a hoi a, mit ta ranga thil ihoi chu nîsa vâr imu hi a nit.

⁸A nit, kum itam takka ni dam sung murdiah khan lôm mai inla; khannisela, izîng hong itlung rang kha ai sôt rang a nit iti remai roh. Thil dang îte itûng rang ai om ino a nit.

⁹Vânglâihei o, nin vânglâi hun mang inhoi rei. Nin la ṭhat lâiah hin râifân takkan om rei. Nin inuam murdi khah tho unla, nin lungril irzuk tak kha zui rei. Khannisela, Pathianin nin chungah roi a lai rêl rang a nit iti remai rei.

¹⁰Itên nin lungril insôl no sela, nin takpum innatu om no riseh. Nin vânglâi zoro kha ai sôt ino rang a nit.