Read Biete THURILTU 12 Bible Online

THURILTU 12 - Biete bible

THURILTU 12

¹Ni vânglâiah hin nang isiamtu remai roh, sûn ṭhanohei a hong tlung ma neh, “Lômna rêng rêng nei mang e,” ni tina rang kumhei a hong nâi mah hin.

²Inî vârhei, ithla vârhei, ârsi vârhei kha ni ta ranga a zîng ma neh ruapom sûmpui arlen tlak khâi no tik a tlung mah hin.

³Khanungchu, nang ivêngtu ne bân kha hong inthing a ta, ni kehei atûna ritha nei khah hong rizal tâng a ti. Ni buhei ikhâi inchipna rangin ni hâhei mûi zoi tâng a ta, ni mithei hong izîngin mun fel thei khâi no tin e.

⁴Ne kuarhei hong isêtin lampuia irîhei reh khâi no tin a, fasuk irîhei neh thil irîhoihei khom reh thei khâi no tin e. Khannisela, iva râm irite khomin ni inrimu nang inṭhang a ti.

⁵Mun risânghei kha irîng tâng ni ta, ilôn khom inrît ti tâng ni ti. Ni sam ṭuak tâng a ta, ni khâtin rivâk zizâm ilua intak ti tâng ni ta, taksa rizukna murdi boi tâng a ti. Ni kumtluang ringamna tiang pan ni ta; khanchu, lampuiheiah nang ṭâ tâng an ti.

⁶Tangkarua zingziri kha chat a ta, rângkachak berbu kha koi a ta; tuisunsua ata tui ikhâi suakna rui kha chat a ta, tuibêl kha koichit tâng a ti.

⁷Takpum chu rinêng ipilah kîr nôk a ta, rithla chu a petu Pathian ziangah kîr nôk a ti.

⁸Thuriltu khan, “Chanlamboi korong a nit, thil tinrêng hi chanlamboi korong a lei nit,” a ti a.

⁹Thuriltu khah a vâr sikin a thil riat kha mihei a înrisei ngai a nit. Thuvâr itam takkah a ngaitua a, takritâi takkan an idikzia ai fia ngai a nit.

¹⁰Thuriltu khan thu pom inrup imu rangin a zong a, thutak thuhei kha tluangintlâi takkan a irziak a nit.

¹¹Mi vâr thu kha berapuhein an bera hôlna ranga an imang irol rizum angkah a nit a, thuvâr lâk khômhei kha thîrkilna hêm indet khap angkana om mai rang a nit. Ne enkoltu Pathian ne ipêk korong a nit.

¹²Ki Naipa, thil ṭhenka la ngaituan ṭha rang a om sa. Lekhabuah tinrêng riziak riai thei ni mak; risei intam rai khom hi taksa rizalna a nit.

¹³Hi thuhei murdi kîmna hi ringai roh; Pathian ṭin la, a thupêkhei zôm roh; amakhah miriam siamna bi a nit.

¹⁴Pathian khan ei sintho murdi chungah roi a lai rêl rang a nit; â ṭha manih, â sia manih, idâirekka ithohei khom a lai rêl rang a nit.