Read Biete THURILTU 2 Bible Online

THURILTU 2 - Biete bible

THURILTU 2

¹Ki lungrilin hoiinhâi takkan om ki ta, râifânna im ai nit lei reh suak rong ki ti a. Khanniseh hi khom hih chanlamboi a nit iti ki mu suak tâk a.

²Inui hi invêt sin a nit zia ki mu suak a, nunkhohoi lak îte rifena a om nozia ki riat suak tâk a.

³Vân nuai miriam naihei damsung itôite mang inhek dân iṭha tak a nit lôi im itin vârna zongin uain iina râifân risak ki tum tâk a.

⁴Sin roinpui takhei ki sin zoi a, ki ta rang inhei ki sin a, ki grep rikul rang ki siam a.

⁵Rikulhei neh theibilhei ki siam a, amakhan theikung chi tinrêng ki phun a.

⁶Theibila theikung thuar lâihei ifâna rangin dîlhei ki siam a.

⁷Bôi itam takkah ker chôk a, ki ina suak bôi an om sa a. Ki matona Jerusalema lei iomhei murdi nêka tam ualin sial hei, kêl hei neh bera hei khom ki nei ngut a.

⁸Ki ram ophei sum siana rithokin tangkarua neh rângkachak hei ki bûm ngut a. Ipa neh nupang zâithiamhei khan lâhein an ne uai a; ipa idit lam tak nupang itam takka kî nei a nit.

⁹A nit, ki roinpui a, ki matona Jerusalema omhei murdi kha ki khûm a; ki vârna khah ki mang tak tak a.

¹⁰Ki irzuk kangân chu ki mu ngai a, ki lungril lômna rangah khan intûm tlak ngai mang a. Ki sinthona murdiah khan ki lungril chu a lôm a; ki sinsôlna murdia ki loman chu kî mu a nit.

¹¹Khanungchu, ki kut suak murdihei neh ki sinsôlnaa ki thiltho murdihei ki hang ngaitua kîr a, thil tinrêng hih chanlamboi neh phâivua rizûl angkah ringot a lei nit a; inî nuaiah hin rifena om rêng rêng omak e iti ki mu suak tâk.

¹²Rêng khomin a matona rênghei lei itho tâk ban kha ai tho thei ual ni mak. Khanchu, ivâr manih, intlo manih, invêt manih hih im ai nit iti ireh suak rangin ki hang ngaitua a.

¹³“Izîng nêkan chu ivâr ai ṭhat angkan intlo nêkan chu ivâr a ṭhat ual iti ki riat tâk a.

¹⁴Mi vârhein chu an fena an riat a, mi intlohein chu reh ngai mak e,” iti ki riat a. Khannisela, ei rêngkan khuanurêl thumunin a ne ngâk korong iti khom kî riat sa a nit.

¹⁵Khante, ki lungrilah khan, “Mi intlo chunga tlung angkah ngir kha ki chungah khom ai tlung rang a nit a. Khasikin, ki vâr bîkna hin im rifena a om a?” ki ti a. Ki lungril ngirah khan, “Îte rifena omak e, chanlamboi korong a nit,” ki ti a.

¹⁶Mi intlo khom tutên remai no nia, mi vâr khom tutên remai ual no nih. Sûn la hong itlung rangheiah khan ei rêngkan ringil phar ei lai nit rang a nit. Mi intlo angkah ngirin mi vâr khom ei rêngkan ei lai thi ngêt rang a nit.

¹⁷Khasikin, ringna hi kî chim a nit; inî nuaia thil itho rêng rêng hi beidong ne saktu korong a nit. Thil tinrêng hih chanlamboi korong a nit a, phâivua rizûl angkah pai a nit.

¹⁸Khante, mi ke nunga ne thûltu ta rangin kî mâk pêk riai rang a nit iti ki riatin inî nuaia ki sinsôlna murdia ki thilthohei chu kî nel a nit.

¹⁹Ke nung ithûltu rang khah mi vâr a nit neh mi intlo a nit khom tûm â ria a? Khanniseh, inî nuaiah ki vârna manga ki sinsôlna râ murdi neitu a hong init rang tâk a nit a. Hi khom hih chanlamboi korong a nit.

²⁰Khasikah khan inî nuaia ki sinsôlna murdia kî tho tâkhei murdi chungchângah khan ki însîr rum rum a nit.

²¹Ni vârna neh riatna neh thiamna hei imanga ni thiltho kha, sin viat tlak ino mi ziangah a dongtum rangin nî mâk pêk rang a nit a. Hi khom hih chanlamboi a nit a, thil dik ino tak a nit.

²²Ni sinsôlna murdiah neh lungril isôl takka inî nuaia ni sinthonaah khan im ni mu a?

²³Ni damlâi sûn murdihei kha ni sinthona kipah tuangna neh lungril natna ringot nang a îthlun pêk a nit. Zâna lua khom ni lungril sôl ringam thei mak a. Hi khom hih chanlamboi korong a nit.

²⁴Miriam ta rangin chu ifa neh iin bana ṭha omak a, min a sintho râ chu a lungril ifân takkan fah riseh. Khannisela, hi khom hih Pathian kuta rithoka a nit iti ki riat tâk.

²⁵Ama boiin tu ngân im fâk ifah thei neh râifân risak thei om an ta?

²⁶Pathianin ama inlômtu ziangah khan vârna hei, riatna hei, lômna hei a pêk ngai a, mi sualhei kha chu Pathian inlômtuhei dongtum rangin thil ân lâk bûm a, ân ritik bûm ngai a. Khannisela, hi khom hih chanlamboi korong a nit a, phâivua rizûl angkah a nit.