Read Biete THURILTU 3 Bible Online

THURILTU 3 - Biete bible

THURILTU 3

¹Vân nuaia thil iom tinrêng hi Pathian zoron rifûk chita om a nit.

²Suak zoro a om a, thi zoro a om; Phun zoro a om a; ikar nôk zoro a om.

³That zoro a om a, indam zoro a om; Ṭhet zoro a om a, sin inding zoro a om;

⁴Ṭap zoro a om a, inui zoro a om; Sûn zoro a om a, lôm zoro a om;

⁵Lungthlung zoro a om a, lungthlungno zoro a om. Ririam zoro a om a, ririam no zoro a om;

⁶Mu suak zoro a om a, inrimang zoro a om; Rê ṭhat zoro a om a, pai inrimang zoro a om;

⁷Potthlêr zoro a om a, ṭhui inṭhat zoro a om; Dâirek zoro a om a, ṭong zoro a om;

⁸Lungthlung zoro a om a, nel zoro a om; Ridoi zoro a om a, ringei zoro ai om a nit.

⁹Sinthotun a sinsôlna ata im rifena ai mu a?

¹⁰Pathianin sin irik tak ei chunga ai bâng hih ki riat tâk.

¹¹Thil tinrêng rangin an zoro dik thap ân kung pêk a. Miriam lungrilah khan sûn matona la hong iom rang riat nuamna a pêk a; khannisela, Pathianin atîr ata a mong idêna thil ai tho khah rianfel riaia, lungtlukna chu peh mak a.

¹²Khasikin, ei damsungah hin râifân takka ei tho rang tum ei thei dôrka tho hih ei thei tôk a nit iti ki riat tâk.

¹³Mi tinin fâng ei ta, in ei ta, ei sinsôlna râ khah râifân takkan ei fâk rang a nit, amakhah Pathian thilpêk chu a nit.

¹⁴Pathian sintho rêng rêng chu kumkhuakan ai om mai rang a nit iti ki riat. Îte ibôk thei ni mak a, îte inrikâi thei khom ni mak e. Miriamhein amah ei ṭi theina ranga Pathianin khahei khah ai tho a nit.

¹⁵Thil om lâi hei neh thil la hong iom rang hei khom kha lei om isa tâk ngir kha a nit. Pathian khan thil lei iom tâk ngai kha a în-om nôk ngai a nit.

¹⁶Kha ti no khom rivân nuaia thil kî mu sa chu hihei hih a nit: Thleibîk nei nona neh idik taka rêlna rang muna pualoina om hi a nit.

¹⁷Ki lungrilah khan, “Pathianin mi fel neh mi siahei roi khom rêl a ti; thil tinrêng rang zoro rifûk a siam a, sin tinrêng tho rang zoro khom a înkung a nit,” ki ti a.

¹⁸Ki lungril ngirah khan, “Miriam naihei chungchângah khan ramsa angkah pai an nit iti, ki riat theina rangin Pathianin a ne ifia a nit,” ki ti a.

¹⁹Miriam naihei chunga tlung neh ramsahei chunga tlung kha thumun a nit a, an ithi seng seng rang a nit. Rithuak ri-ang bang inei seng seng an nit a, miriam khan ramsa nêka inchung bîkna nei mak e; thil tinrêng chanlamboi korong a nit.

²⁰An rêngkan mun khatka tah an fe riai a; an rêngkan ipila rithok an nit a; an rêngkan ipil an ichang nôk riai a nit.

²¹Miriam naihei rithla kha chungtiang a fe a, ramsa rithla kha nuaitiang rinêngah a fe iti tu ngân im â rianfel a?

²²Khasikah khan miriam kha a sinthoheia ai lôm nêka ṭha ual îte omak e, iti ki riat suak tâk. Amakhah ei tho thei sun iom chu a nit. Khabanah khan chu â nunga thil la hong itlung rang tu ngân im â reh thei rang a?