Read Biete THURILTU 4 Bible Online

THURILTU 4 - Biete bible

THURILTU 4

¹Khanungchu, ki hang thlîr nôk a, inî nuaia risirdena omhei murdi khah ki mu a, sirdea omhei kha an irung a, ṭangpuitu lak nei mak a. Anmani sirdetuhei tiangah khan thuneina a om sikin tute â san rang an iom ino a nit.

²Khasikin, a lei ifam tâk, mi thi tâkhei kha ki irzuk a nit; mi a la ringhei nêkan mi thi tâkhei kha an vân ai ṭhat ual a nit.

³Khanniseh, khahei nêk khoma â ṭha ual chu la zuang suak ino, inî nuaia thil ṭhano om la zuang muno kha ai ṭhat ual a nit.

⁴Khante, min manchang isuak ngêt ranga sin a tho tak takna ngai bi chu a bungtualbôm a thîk sika a nit iti ki riat tâk. Khanniseh, hi khom hih chanlamboi korong a nit a; phâivua rizûl angkah ringot a nit.

⁵Mi intlo chu a kut a kuangrikua a, dangindan a thipui ngai iti hi a nit a.

⁶A dik khom a nit thei; khanniseh, lungril sôl idam riamka kut têka bang inei khom hi ibuaia isôl nengka sina kut sip inika nei nêkah khan chu ai ṭhat ual a nit.

⁷Ki hang thlîr nôk a, ringnuna chanlamboi hi ki mu nôk a.

⁸Mi khatkah, a khât banga om a om a. Ani khan naipa manih, inzirpui manih khom nei mak a; khanniseh, mong loi chât loiin sin a tho sôl a, archon neiah khan â lung zel tluk thei mak a. Mahni tak hoina chân riaikan tu ta ranga ai sinsôl im ni tâng a ti? Hi khom hih chanlamboi a nit, ringnun inkhôk tak a nit.

⁹Khatka nêkan chu inikah kha an ṭhat ual, an ruaikan chu sin an tho ingor thei ual sikin.

¹⁰Khatkah â lîr khomin khatkah khan â thoi inding thei a. Khannisela, mahni khât banga om kha chu â lîrin chu, tute â thoi inding rang an omno sikin a chung a înkhôk a nit.

¹¹Kha ti no khom khah, a dâi natinsat khomin inikah chu munka zâlin an ir-op inlum risak thei a nit a; khanniseh, khatkah bang chu a khât bangin ingkan im a lumpam thei rang?

¹²Khante, a khât banga om kha min inê thei khom sela, inikah khan chu an lei idoi zoi thei a nit. Rui a tezêm iom chu chatzel ngai mak e.

¹³Naipang inriang ivâr tak chu mi vâr roisakpui khom ringai nuam ino rêng itar tâk nêka khan a ṭhat ual a. Insungkua inriang taka rithokin manih, tâng in ata rithokin manih khom ni seh a ramah khan rêngṭhungmunah a la îṭhung thei a nit.

¹⁵Inî nuaia lêng miriamhei kha ki ngaitua a, an lâia naipang tu khôk manih khan rêng mun khah a la hong ithûl rang a nit iti ki riat suak tâk a.

¹⁶Rêng kha tep zoi loi chungah roi rêl khom sela a thi nungah khan chu tute a chungah lôm ngai mak e. Hi khom hih chanlamboi a nit, phâivua rizûl angkah pai a nit.