Read Biete THURILTU 5 Bible Online

THURILTU 5 - Biete bible

THURILTU 5

¹Pathian inah ni fe lâiin ni ke veng inṭha roh. Mi intlohei khan thil ṭhano an itho khom reh loiin ribôlna an lan a, khangkana tho nêkan chu kha muna ringai ranga fe kha a ṭhat ual.

²Ni ṭong suak man ngaitua bak inla, Pathian ziangah ṭongrikhâm pai pai no roh. Pathian chu rivâna om a nit a, nang chu rinênga om ni nit, khasikah khan ni tho rang ban chu îte ti pai pai no roh.

³Ni buai dôrkah ner mang khom ai siat rang a nit a, ni ṭong tam dôrkah intlo ṭong nî tho intam rang a nit.

⁴Khasikin, Pathian ziangah ṭong ner khâmin chu ngamringil no roh, ani khan mi intlo kha ai lôm ngai ino a nit. Ni ṭongrikhâm kha len ngêt roh.

⁵Ṭongrikhâma len ino nêkan chu rikhâm ino kha ni ta rangin a ṭhat ual.

⁶Ni ṭongbâi suak khan sualah nang ṭhui no riseh; khanchu, Pathian thiampu ziangah ki înkung insual duai tâk kêng ti no tin e. Îtho rang im ni ṭongbâi suakin ni chungah Pathian ning ni înthik rang a? Îtho rang im ni kut suak thilhei khan nang a înrimang rang a?

⁷Rimang itam takka phanin, sin chanlamboi itam takka thon, thu chanlamboi itam takkah ril khom inla, Pathian ni ṭi rang a nit.

⁸Ram sunga thuneituhein inriang an sirde a, tharumin roirêl diknahei neh felnahei a lâk inrimang zoi tâk iti ni mu khomin rikhêl ti no roh. Mi lian chu a chunga mi lian ualin ân zôkriam ngai a, anni ruai khom kha anni nêka risâng nôk ualhei khan an la înzôkriam nôk ngai a nit.

⁹Rinêng rak chu mi murdi ta rang a nit a, rêng ilua khom loima rin mi a nit.

¹⁰Sumpuan ringaiinnatu khan sumpuanah â lung tluk no nia; richong ringaiinnatu khan a lungtluk mu ual no nih. Hih khom hih chanlamboi a nit.

¹¹Mi an richong dôrkah â fah rang an ipung ngai a nit, â neitu ta rangah khan archongzia a mita ai mu ringot ti no chu îte rifena om ual mak e.

¹²Ifah rang an nei tam manih an nei roi manih khom ni sela sinmi chu zân inrimu nik takkan a in thei ngai a. Khannisela, mi richong khan chu thil a nei intam sikah khan a lungril isôlin ai in thei ngai ino a nit.

¹³Inî nuaia thil inkhôk tak kî mu chu amahih a nit: mihein a nang zoroa mang rang itin sum an riting a,

¹⁴an vânduai rang pialin an sum riting inrivaia inpung an tumna malamin an îchân riai a, an naihei imah pêk rang khom an inei khâi ino hi a nit.

¹⁵Ei nuhei phûng ata ei zuang suak lam angkah takin korongboi ngirin hi rammual hih ei imâk nôk rang a nit. Ei sinsôlna râ îte ei chôi thei rang omak.

¹⁶Hi khom hih thil inkhôk tak a nit. Ei zuang lam angkah takin ei ife nôk rang a nit. Lungril isôl takka ei sinsôlnaah khan îngân im rifena a om a?

¹⁷Ei damsung sûn murdi izîng nuaiah ei lêng a, inṭop ringaiinseh takka natna tuangin neh ningthik pumin ei imang inhek ngai a nit.

¹⁸Ringai roh, amahih ki thil mu suak chu a nit: Pathianin dam sung zoro tôite a ne ipêkah hin ei sinsôl irâ kha râifân takka ei ifâk a, ei iin a, ei imang hi thil iṭha tak chu a lei nit; amakhah ei vânton chu a lei a nit.

¹⁹Pathianin richon sumpuan a ne ipêk râifân tak neh ilôm takka mang theina hih Pathian thiltlongpêk a nit.

²⁰Pathianin lôm theina a ne pêk sikin ei dam sung sûn tôizia ngaituan lung isôlin ei iom ino a nit.