Read Biete THURILTU 7 Bible Online

THURILTU 7 - Biete bible

THURILTU 7

¹Riming ṭhatna hi riak ilu tak nêkan khom a lut ual a, suak nî nêkan thi nî a lut ual.

²Ruaiṭhe ina fe nêkan chu lusûn ina fe a ṭhat ual; amakha mi murdi mongna a nit sikin ringmi kangânin chu thinan a ngâk ṭian iti an riat mai rang a nit.

³Inuina nêkan chu ngaisiatna a ṭhat ual; ni mêl inngûi man seh ni riatthiamna inngaih a ti.

⁴Mi vâr lungril chu lusûn inah a châm ngai a; mi intlo lungril chu ruaiṭhe inah a om ngai.

⁵Mi intlo înpâkna ringai nêkan chu mi vâr ngona ringai a ṭhat ual.

⁶Mi intlo inui irî chu ritap meia riling ikâng ipuak ṭak ṭak angkah hi a nit a, îte omzia nei ngai mak e.

⁷Mi vârin mi lêm a songin chu invêt tak a nit. Fâkinrûk ila hin mi â siat ngai.

⁸Thil tinrêng riphutna nêkan a mongna chu a ṭhat ual ngai. Lungrila ripâk nêkan chu lungril idil thei hi a ṭhat ual.

⁹Ni ning inthik zel no roh; mi intlohein chu ningthikna kha an vong mai ngai.

¹⁰“Atûn lâi nêkah hin tianlâi sûnhei kha îtho sika ṭha ual im ai nit?” itin ridon tlak no roh. Ivâr ṭong ni mak e.

¹¹Vârna nei hi richon ilua tluka ṭha a nit a. A nit, tukhom â ring kangân chu an vâr ngêt rang a nit.

¹²Sum puan hi zôkna ai nit angkan vârna khom hi zôkna a nit. Amakhah riatna nei rife omna chu a nit.

¹³Pathian sintho hi ngaitua ta, a inkôi tâk kha tûm ân tlûn thei rang a?

¹⁴Vângsak inṭum lâiah khan lôm inla; vânduai nî-ah khan hihei hih ngaitua roh: Râifânna neh vânduaina hih Pathianin a îthlun a nit; thil hong itlung thiai mai rang khah nî riat thei lak ni mak a.

¹⁵Ki ringnun chanlamboiah hin thil tinrêng ki hong mu tâk a. Mi dik chu â dik sikin a thi a; khanniseh, mi sual chu thil isual tho mai pum khomin a ring a sôt ok ngai a.

¹⁶Fel rai non la, vâr rai no roh, ithôm ni khâtin ni irthat rang?

¹⁷Khannisela, isual khom isual rai non la, intlo khom intlo rai no roh; îtho rang im ni zoro a tlung man nî thi rang?

¹⁸A îtiang khom a rai kâi no roh. Pathian ṭin la, lam tinah lo tluk mai ni ti.

¹⁹Khopuia roirêltu sômka nêkan vârna khan mi vâr khah ân rât ual ngai.

²⁰Rinêng chungah hin mi dik, thil iṭha tho a, thil isual tho tlak ngai ino tute om viat mak e.

²¹Mi thusîr tinrêng kha ne kuar sung no roh, ne somin vâni nang a sâm reh duai ni ti.

²²Nangmah ngêi khomin mi danghei vâni ni sam ngai iti ni lungrilah remai roh.

²³Hihei murdi hih ifia rangin ki vârna ki mang tâk a. Ivâr ki tum a; khannisela, ki thei ban a nit.

²⁴Ringnun omzia tak chu inthûk tak a nit a, tu ngân im â mu suak thei rang a?

²⁵Khannisela, vârna neh thil omzia reh rang hei, imu suak rang hei, izong ranghein ki lungrilin ki thlîr vêl a; siatna hih invêtna, invêtna hih intlôkna a lei nit iti reh rangin kî thlîr vêl a nit.

²⁶Thil khatkah, thina nêka inrît chu nupang isual hi a nit iti ki mu suak tâk a. Lungthlungna nang ai pêk khan châng manih, lên manih iman angkan nang man a ti; mi a îpom chu zingziria khuap angkah a nit. Pathian inlômtu chu a kut ata zôk a ta, thil thonsualtu chu man khap a ti.

²⁷Thuriltu khan, “Thil omzia chu ichîn chîn kan ki riat thiai thiai tâk a.

²⁸Ki nuamlam dôrkah chu la reh thei no khom inlang mi sângka lâiah mi ṭha ipa khatkah ki mu a; nupang vâng chu khatkah khom mu mang e.

²⁹Amah bang hih kî mu suak chu a nit: Pathian hin miriam hih mi ṭha inih rangin a siam a; khannisela, ei mahni nuam lamin kôiikimin ei iom tâk a nit,” a ti a.