Read Biete THURILTU 8 Bible Online

THURILTU 8 - Biete bible

THURILTU 8

¹Mi vâr bangin thil omzia kha a riat a. Vârna khan a mit mâi ân ri-al a, a mêl khom a îndanglam ngai a nit.

²Pathian makunga ni ṭongrikhâm sikah khan rêng thupêk zôm roh.

³A thu thua thil a tho thei sikin thu dik ino a makungah thlop khap no roh.

⁴Rêng kha thu nei takkan ai châng ngai a nit a, a thiltho kha tutên an isêl thei ino a nit.

⁵A thupêk ni zôm kârkah chu îte tuang no tin e; mi vâr khan chu a zoro taka thil tho rang dân idik ai riat ngai a nit.

⁶Thil tinrêng hin tho zoro neh tho rang dân zia a nei a; khanniseh, ei riatna hi ai roi tak tak a nit.

⁷Thil hong itlung rang kha tutên reh mak a, a hong om dân rang khom tute â sîr thei omak e.

⁸Thina ata a khâta rizôk thei tute omak a, a thi nî sûn indanglam thei khom omak e. Kha ridoina kha ei izôk thei ino a nit; milak khomin suak thei no min e.

⁹Inî nuaia thil itho murdi rikip takkan ki ngaitua a, amahih kî mu suak a nit; mi ṭhenkah mi chungah thu nei takkan an om a, mi ṭhenkah chu an thunuaiah an ituang ngai a nit.

¹⁰A nit, mi siahei ithlânah an phûm ki mu a; khannisela, mihei khan thlânmual ata an hong kîr nôkin chu thil isia an lei sinna ngai khopui ngêiah khan anmani inpâkna an ril ngai. Hihei khom hih chanlamboi a nit.

¹¹Thil thonsual chungah kuttum itho zel a nit ngai no sikin miriam naihei lungril kha thil isual itho rangin a hong ingam tîr tîr ngai a nit.

¹²Mi sual khan voi izâkah thil isual tho khom seh a dam mai a. A nit, im an iti ki riat, “Pathian thu ni zômin chu tinrêng hong ṭha korong a ti.

¹³Khannisela, mi sualhei ta rangin chu îte ṭha no nih. Pathian an ṭi no sikin an ringna khah rilîm angkah a nit a, an vânglâiin thîng an ti,” itin.

¹⁴Khannisela, rinêng chunga thil iom, chanlamboi tak tak a om a: A kârah chu mi dikhei khan mi sualhei tuang rang kha an tuang a, mi siahei khan mi dikhei loman kha an idong pêk ngai a nit. Hi khom hih chanlamboi korong a nit kî ti a nit.

¹⁵Khasikin, inî nuaiah hin ifa neh iin neh ihoi takka om bana thil iṭha îte miriamin a nei no sikin râifânna hih a ṭhat kî ti a nit. Amakhah inî nuaia a dam sung sûn Pathianin ai pêk murdia a sinsôl puma ai tho theisun chu a nit.

¹⁶Vârna nei rang neh rinêng chunga thil itlung murdi ireh ranga sûn neh zân inrimu man loia ki lungril ki hang mangah khan,

¹⁷Pathian sintho murdi inî nuaia tho tâkhei kha mîn mu suak thei mak iti ki riat tâk a. Min zong titak man sela, mu suak thei no nih. Mi vârhein iria riti man sela an iriat bîk ino a nit.