Read Biete THURILTU 9 Bible Online

THURILTU 9 - Biete bible

THURILTU 9

¹Hi thilhei murdi hih ireh suak rangin ker voi tak tak ngai a; mi dikhei neh mi vârhei thiltho murdihei, mi dang an lungthlungna neh an nelna ten khom Pathian kuta om a nit. Tutên an sûn maton îte reh mak e.

²Mi murdi chungah thil itlung a ir-ang riai a nit: mi dik neh mi sual, mi ṭha neh mi pualoi, mi rithiang neh rithiang inohei, ribôlna lan ngai mi neh lan ngai ino mihei chungah thil thumun ai tlung a nit. Mi ṭha kha mi sual nêkan ṭha ual mak a; ṭongrikhâm ngai mi kha rikhâm ino mi nêkan ṭha ual mak e.

³Amahih a nit, inî nuaia thil itho murdia thil ṭhano chu, mi murdi chunga thil thumun itlung hi miriam naihei lungril lak chu an damsung kârkah sualna neh invêtnaa sip a nit a; khanchu, voikah zelin an ithi ngai a nit.

⁴Khannisela, mi iring idama la omhei ta rangin chu tûngna a la om; sakeibaknei ithi nêkan chu ui iring kha a ṭhat ual.

⁵A nit, mi iring idama la omhei khan an lai thi rang iti an riat a; khannisela, mi thi tâk khan îte reh khâi mak. Loman nei khâi ngai mak a, iremai khom ni khâi ngai mak.

⁶An lungthlungna hei, an nelna hei, an rizukna hei kha anmani rualin ai thi tâk a nit. Hi rinêng chunga thil itlungheiah hin îte ṭangna rêng rêng nei tlak khâi no nih.

⁷Fen la, ilôm takkan ni bu nen la, lungril ifânin ni uain in roh; Pathianin ni thilthohei kha a îpom tâk a nit.

⁸Ni silbomhei kha fâidak mai sela, ni lu khom siriak risam no riseh.

⁹Inî nuaia Pathianin nang ai pêk ni zoro chanlamboi sung murdiah khan ni nupui lungthlung tak neh khan ring khohoin om roh; amakhah damsunga ni dongtum neh inî nuaia ni sinsôlnaa ni dongtum chu a nit.

¹⁰Ni kutin itho rang ai nuam kangân chu takritâi takkan tho roh; ni fena rang mithi khuah khan thil itho rang manih, roiisak rang manih, riatna manih, vârna manih om khâi no nih.

¹¹Thil dang khatkah ki riat nôk a, amakhah inî nuaia tlân risiaknaah mi rât kha lo tluk ual mak a, ridoinaah mihâi kha nêna chang ual mak; mi vârhein fâk mu ual mak, mi bengvârhei kha richong riai ual mak, mi kutthiamhei khan ditsakna dong mai ual mak e. Mi murdi chungah vânduaina chu ai tlung korong a nit.

¹²Miriamin tikin im ama zoro ai tlung rang reh mak e, iva voikah zela chânga ôk angkan neh inga lêna man angkan miriam naihei khom an intûng no lâi takin an chungah hong itlung thutin zoro ṭha no-ah an î-ôk ngai a nit.

¹³Vân nuaiah hin mîn vârna an thlîr dân entîrna ṭha tak ki mu sa a, ki irngai poimo ok a nit.

¹⁴Khopui ichînte a sunga mi iroicheka omna a om a, rêng roinpui takin a hong doi a, a hual a, a kulpuihei isim rangin arsiam a.

¹⁵Kha khuaah khan mi inriang ivâr tak a om a, a vârna sikin khopui kha ân zôk tâk a. Khannisela, tutên kha mi inriang khah remai khâi mak.

¹⁶Mi inriang vârna kha imusita omin, a thu khom ringai pêk nino man sela, keiman chu, “Râtna nêkan vârna a ṭhat ual,” kî ti ngir a nit.

¹⁷Mi vârhei thusîr idâi riam ringai kha mi intlohei lâia roirêltu khêk rak rak ringai nêkan chu a ṭhat ual.

¹⁸Vârna kha ridoina riamrei nêkan a ṭhat ual a; khanniseh, mi sual khatkan thil iṭha itam takkah â siat thei ngai.