Read Biete LÂHEI LÂ 1 Bible Online

LÂHEI LÂ 1 - Biete bible

LÂHEI LÂ 1

¹Solomona iphua lâ chungchuang bîkhei.

²Ni mûrin ne tum vong vong roh dua, Ni lungthlungna chu uain nêkan a thlum ual e.

³Ne nam chu a hoi vang na! Ner ming chu namhoi bun suak angkah a nit e, Khasikah khan nungâkhei khan nang an îdit tak tak a nit.

⁴Ni ziangah ne ṭhui inla, dîthang itlân ei ti. Ki rêng chang inla, ni chontanah ne ṭhui inlût roh. Râifânin munkan lêng ei ta; Lungthlungna nîngtui iinin lei ririam rei. Nungâk murdîn lung nang an ithlung ngêt rang chu a nit na!

⁵O Jerusalem nainuhei, ki tak hâng khom sela, ditiom tak ki nit. Kedar ramchâr puan inhei angkan duk khom inlang, Solomona rêng in puanzârhei angkan kî ṭhat a nit.

⁶Ki hâng viat sikin ne sit no rei, nîsa ne em sika kêng ai nit; Ki ṭahei ki chungah an ning a thik a, Grep rikul an nen enkol a, ki ir-enkol phâk ino a nit.

⁷Ne ril roh, O ki lungthlung, Taktiang im ni bera lômhei nen lêng rang? Sûn lâiah taktiang im nen ringam rang? Îtho rang im nangma zongin berapu danghei lâiah, ki irvâk ki irvâk rang?

⁸O nangmah nupanghei lâia mêl iṭha tak, a mun nî riat ino a nitin chu, Bera lôm ke nung kha zui thal inla, Ni kêlhei kha berapuhei puan in kôlah khan inlêng roh.

⁹Nang ken richak ngai, O ki lungthlung, Faroa tâli sakor rilate neh khan.

¹⁰A ṭhat vang e, ne bianga bâsam phiar ikâi niang, Ni ringa lungilu rithei angkana zuang ikâi niang neh khan.

¹¹Rângkachak rithei neh tangkarua rivona nang siampêk kin ti.

¹²Ki rêng kha zâlmunah a zâl, Ki nard namhoi kha a lêng riuai, insung a sip.

¹³Ki lungthlung chu ki ta rangin Mura namhoi a nit, Ke ṭâng chungah â bei lâiin.

¹⁴Ki lungthlung tak chu ki ta rangin Hena pâr ikhusap, Engedi grep rikula pâr ngai angkah a nit.

¹⁵Ni ṭhat vang e, ki lungthlung, ni ṭhat vang na! Ni mitmeng chu ṭhuva angkah a nit e!

¹⁶Ki lungdi, ni ṭhat vang e! A nit, ki lungthlâi, Ei lâikhum chu sûl iring kha nîng a ti.

¹⁷Ei inchung chu sidar thing, A chung zol khom ifâr thing a nit.