Read Biete LÂHEI LÂ 4 Bible Online

LÂHEI LÂ 4 - Biete bible

LÂHEI LÂ 4

¹Ringai ta, ki lungthlung, ni mêl a ṭhat vang na! Ni puan lukhum nuaiah khan ni mitmeng chu ṭhuva mit a ang e. Ni bâsam chu kêl lôm, Gilead tlâng panga rikôi dûl dûl a ang e.

²Ni hâhei chu berapui lôm mul mêt zoiphing, Tui inrisil zoiphing angkan a vâr a. Khatka lua â thlam om loiin, An rêngkan rikoppui an nei chit a, an irtlâng dat a nit.

³Ni nerhei khan a ang e, pârsen, Ni mûrchâng kha dit a om vang e. Ni lukhum nuaiah khan ne bianghei chu theisen phal a ang e.

⁴Ni ring ônin a ang e, Davida thlîrna in risâng, Râlthluk sâng itam tak an siana khah. Amakhan ipho sâng itam tak an ikhâi e, Râlpahei ipho murdi ngêi khah.

⁵Ne ṭânghein a ang e, sazukte inphîr, Lili kâra lêng ngaihei kha.

⁶Zîng thlifim a râng a, Zân thim a boi ma a hin, Fêng ki ti, mura tlângah, bero mual ngêiah khan.

⁷Ni ṭhat rikip vang na, ki lungthlungtak, Nangmaah khan demkâina zel omak e.

⁸Lebanon tlânga rithokin ne hong zui roh, ki lungdi, Lebanona rithokin munkan fêng ei ti. Amana tlâng sîp ata zuang ṭum inla, Sakeibaknei neh keiârsi hei lêngna, Senir tlâng neh Hermon tlânga rithokin munkan fêng ei ti.

⁹Ki lungril ne nê zoi tâk, ki lungdi, ki nupui, Ni mita siaina neh, Ni ringa rithei ni ilî khan ki lungril a lâk zoi tâk.

¹⁰Ni lungthlungnan a nen lôm vang na, Ki lungdi, ki nupui. Ni lungthlungna chu uain nêkan a ṭhat vang na! Ne nam chu namhoi chitin rênghei nêkan a hoi ual e.

¹¹O ki lungdi, ni ner chu khuaituiin a far e, Ki ta rangin ne lei chu dût neh khuaitui a nit. Ni silbom khom Lebanon namhoi â nam vang vang e.

¹²Ki lungdi, ki nupui chu rikul irung khap angkah a nit, Dâipuia rikul khap, tuinâr tamna;

¹³Thing tin a thuar dûtna angkah a nit. Amakhan theisenhei an phun a, râ ṭha a sua ngai a. Hena neh Nard a tam tak tak a.

¹⁴Henna neh Nard, Safron hei, namhoi chi tinrêng kung neh thîngthal hei, Bero, mura neh aloe hei, namhoi chi tinrêng rikipna mun a nit.

¹⁵Amakhan tuinâr iring a tam a, a luang zan zan e, Lebanon tlânga kâi vadungte zuang iluang chu ni nit.

¹⁶Har inla, O mâr thlifîm, Hong râng roh, O nang sim thlifîm, Ker kul hi hong sêm unla, a namhoi ilêng suak riseh; Ki lungthlungtak chu rikulah hin hong lût sela, A thei idu tak chu fah riseh.