Read Biete LÂHEI LÂ 5 Bible Online

LÂHEI LÂ 5 - Biete bible

LÂHEI LÂ 5

¹Ki lungdi, ki nupui, ker kulah khan ki hong lût a, Ki Murra neh ki namhoi hei ki lôr bûm a, Ki khuaitui kha a thlâr pumin ki fâk a, Ki uain kha dût neh khan ki in tâk a. Kin lenrualhei O, fah unla, in rei; A nit, lungthlungna kha nin inrui mâkah chu.

²Ki zal ṭian a, ki lungril chu a har vang a, Soh, ki lungthlung takin inkhâr a hong ikik soh. Ne hong iong roh, ki lungdi, Ki lungthlung, ki ṭhuva, ki enchimloi, ki lu chu ridôn a dui zoi a, Ki samhei chu zân izilin ân ridap zoi tâk.

³Ki zakua ki khek tâk a, îtho rang im ki îhâk nôk rang? Ki ke ker sûk tâk a, îtho rang im ki înnim nôk rang?

⁴Ki lungthlung khan inkhâr ri-ongah a hei ipûr a, Ki lungril takin chu amah ki irngai a nit.

⁵Ki lungthlung tak inkhâr iongpêk rangin ki thoi a, Ki kuthei chu Mura tuiah ke chia a, Murra tui kha ki kutṭimheiah a far a, Inkhâr ikalna ki hang iongah khan.

⁶Ki lungthlungtak kha ke ongpêk a, Khan ki lungthlungtak chu a lei rot nôk tâk a. A rôl rivuai iria ki nuam tlia kaneh na! Ki zong ruai e, khan lak tong mang, Ke sam riai riai e, khan lak ne sâm mak.

⁷Khopui irunga fe kualtuhein an ne mu a, An ne tôk a, an ne phop tâk a; Kul vêngtuhein ki mâi rikhûna an ne lîp pêk a.

⁸Nangni kî ngên a nit, O Jerusalem nainuhei, Ki lungthlungtak kha nin mun chu na, Lungthlungnan ker zual zoi tâk iti lei iril rei dua.

⁹O Nupanghei lâia mêl iṭha tak, Ni lungthlungtak kha mi nêkan im a ditom bîkna? Ni lungthlungtak kha mi nêkan im a ṭhat bîkna, Khangkah dôra ni ne ingên tâk kha?

¹⁰Ki lungthlungtak chu a mêl a ṭhatin a sensiam a, Sângsôm lâiah a chungnung bîk e.

¹¹A sakmêlin a ang e, dârtui inluan, A bâsam zêl chu a dum zan e, Thlânrithla i-angin.

¹²A mit hei chu vadungte tui rikama ṭhuzîl mit hei angkah a nit a, Dût tuia risil zoiphing a, vadung rikama fu angkah kha a nit.

¹³A bianghei chu, loi namhoi bil, Namhoi isua ngai angkah a nit a, A mûrhei chu lilipâr, mura tuia far angkah a nit e.

¹⁴A kuthei chu rângkachak thluan angkah a nit a, Topaz lungilua siam kutsabit a bun a, A takpum chu saiha, safir lunga tuam angkah a nit.

¹⁵A pheirâihei chu alabastar lung ivâr thluan, rângkachak ringatnaa phun angkah a nit, A mêl ilang dân chu Lebanon tlângpui sidar thing inzâi vat ai ang a nit.

¹⁶A ṭongbâi suak a thlum vang e, A nit, lungtôn a om rikip vang na; O Jerusalem nungâkhei, Khangkah khah a nit, ki lungthlungtak chu, Khangkah khah a nit, ki lungdi tak chu.