Read Biete LÂHEI LÂ 6 Bible Online

LÂHEI LÂ 6 - Biete bible

LÂHEI LÂ 6

¹Nupanghei lâia mêl iṭha tak, Ni lungthlungtak kha taktiang im ai fe tâk? Ne ril ta, tak lampui âm ai fe, Khanchu, nang zongpui thei kin ti.

²Ki lungthlungtak chu a fe, Ama rikul, loi namhoi munah khan, Bera lômhei ân lêng a, lilipâr ai lôr bûm a nit.

³Ki lungthlungtak chu ki ta a nit a, Kei khom a ta ki nit. A bera lômhei lilipâr lâiah a înlêng ngai a nit.

⁴O ki lungthlungtak, ni ṭhat vang na, Tirza khopui i-angin ni ditom e, Ni dit om e, Jerusalem khopui angkan; Nang ken richak ritlek ichôi pheisen lôm neh khan.

⁵Ni mit khâi ta roh, keimaah hin, A nen zor zoi tâk. Ni bâsamin a ang e, Kêl lôm Gilead tlâng panga rikôi dûl dûl.

⁶Ni hâhei chu berapui lôm tui inrisil zoi phing angkan a vâr a; An rêngkan rikoppui inei chitin an ritlâng dat a, Â thlam khatka lua omak e.

⁷Ne bianghei theisen phal a ang e, Ni puan lukhum nuaiah khan.

⁸Rêngnu sômirukka neh thâikêm sômiriatka banah, Nungâk tep zoi loihei om khom sela;

⁹Ki ṭhuva, ki enchimloi bang hi a nit ki îdit, A nu nai neisun te, A nu lungthlâi te chu. Nupanghein ani khah an mu a, Vân nei an ti a; A nit, rêngnu neh thâikêmhei khomin an inpâk ngai.

¹⁰Tûm ai nit zîng kôlrisam enihoi angkana hong ilang kha, Sor thlapui i-anga môi neh sûn inî ri-el a ang e, Ken richak ngai ritlek ichôi pheisen lôm neh khan.

¹¹Almon bilah ki zu fe a, Phâizôl thing cher rinoi ien rang neh, Grep rimuamhei, theisen a pârhei ien rangin kî fe a nit.

¹²Ker ning no kârin, ki ngaituana khan, Ki mi dittak tâliah khan a nen om tâk a.

¹³Lâm roh, lâm roh, O Salam nungâk, Ni lâm nang kin thlîr theina rangin. Îtho tâk im thlîrtu itamka lâia Salam nungâk ki lâm nin ne ien nuam hi?