Read Biete LÂHEI LÂ 8 Bible Online

LÂHEI LÂ 8 - Biete bible

LÂHEI LÂ 8

¹O ki nu rinu ine sa, ki ṭâpa chu nin la ki ti vang na! Khanchu, tolâiah nang ki mu khomin nang iriam ki ta, Tutên ne dem no nih.

²Nang kâi ki ta, ki nu inah nang ṭhui inlût ki ta, Amakhan lungthlungna nen risei ni ti. Uain namhoi nang lan ki ta, Ki theisen tui ngei kha nang in-in ki ti.

³Â bân voitiang kha lukhamin kham inlang, A kut changtiang ne hei ikua sela chu O!

⁴Nangni kî ngên a nit, O Jerusalem nainuhei, Kin lungthlungna hi inbuai tlak no rei dua.

⁵A lungthlungtak neh hong rikua a, Ramchâr ata hong so tûm ai nit? Appil thing nuaiah nang ken har a, Kha mun ni suakna mun ngêiah khan.

⁶Ni lungril sungah ne tuh ngit inla, Keima ban chu lêng dang sai no roh. Lungthlungna hi thina angkan a rât a, Thîkthu khom Seol angkan a nun a siat a. Meichok angkan a chok suak a, Meiṭhum angkan a kâng ngai.

⁷Tui ibuaka that inrimang thei ni mak a, Tui ilian khomin chîm inrinîk thei mak. Lungthlungna hi min suma richo a tumin chu, Musitna ringot ai dong ngai a nit.

⁸Farnu chînte kin nei a, A nenehei khom lar muam ino a nit. Ei farnu im ei thopêk rang tâk, Amah hong irîmtu a nei tikin?

⁹Ani khah kulbang lei ni sela chu o, Tangkaruan in risâng siampêk ei ta; Ani kha kotbâi lei ni sela chu o, Sidar thing phêkin tuam nôk ei ti.

¹⁰Ki nit hi te, kulbang, Ki nenehei hin a ang, thlîrna in risânghei. Ki lungthlungtak khan, amah neh chu, Lungtlukna neh thlangamna ki nei ngai iti a riat.

¹¹Solomonan Baal Hamon munah grep rikul a nei. Rikulpuhei ziangah khan ân kol; Mi tinin khataka thei irâ man rang, Tangka sângkah chit an hong pêk.

¹²Solomonan tangka sângkah chu dong riseh, Rikulpuhei khom khan tangka rizanika kha dong kikêng riseh. Ki grep rikul, ki ta, keima ta pial kî nei a nit.

¹³Ki lungthlungtak, rikula rithokin ni rôl rivuai, ne hong inringai roh, Ki rualhei khomin ni ṭongbâi suak ireh rangin an ngâk ṭian e.

¹⁴Ki ziangah zuang roh, ki lungthlungtak, Sarza neh sazuktuai angkan, A nit, namhoi omna tlânga sazuktuai angkan zuang roh.