Read Biete ISAIA 1 Bible Online

ISAIA 1 - Biete bible

ISAIA 1

¹Judahei rêng Uzia hei, Jothama hei, Ahaza hei, Hezekia hei inlal lâia Amoza naipa, Isaian Judai ram neh Jerusalem kho chungchâng inlârna ai mu chu hi bu-ah hin inchuang a nit.

²PUMAPA khan thu â sîr e: “Rivân hei, ringai unla; leilung, ne kuar sung roh. Nai ki hong idon inlianhei khan ki chungah an rihel tâk a.

³Serâtin a pu a riat a, sakuartung khomin a pu bu pêkna a riat a; khan, Israelhein chu reh mak a, ki mihei hin reh thei mak e,” itin.

⁴O nam isual, pualoinaa sip, richi sual, nai om rangtlia iduminohei tak hi chu o! PUMAPA chu nin mâk rak a, Israel Pathian Rithiang chu nung nin song tâk a.

⁵Îtho sik im nin irhel mai mai hi? Kuttum nin lai zong mai mani? O Israel, nin lu chu a pumkan sâbe a sip tâk a, nin lungril neh ngaituana khom a pumkan a pop zoi tâk.

⁶Kephaa rithoka lu dên rakkan a damna rêng rêng om khâi mak e; sâbe hei, tôkinridul hei, ipân nâihein ai sip tâk a nit hih. Amakhah risûnfâi mak a, ituam khom tuam mak a, siriak khom nâl ual mak.

⁷Nin ramhei chu inram a nit tâk a, nin khuahei chu a kâng zoi tâk a, nin rinênghei chu ram dang mihein nin mitmu ngêiah an lâk zoi tâk a, nin irâlhein îtinrêng an isiat zoi tâk.

⁸Jerusalem khua bang a la zôk a; nikhomseh, ihual khap a nit tâk a, rikul idâi nei ino grep rikula rungbûk angkan neh fangma bila iṭu angkah hi a nit.

⁹Tinrêngthothei PUMAPA khan mi ṭhenka lua lei zua no sela chu, Jerusalem khua chu Sodom khua angkan kângrivâm tâng a ta, Gomora angkah khan om ngêt tâng a ti.

¹⁰Jerusalem, ni ruaituhei neh ni mihei chu Sodom neh Gomora kho mihei angkah an nit. PUMAPA thu sîr hih ringai unla; ei Pathian Dânah hin nin ikuar sung rei.

¹¹PUMAPA khan, “Ribôlna thillan ki zianga nin hong ilan mai mai hih kî zong nin isôn mani? Nin berachal hâlrivâma nin ilanhei neh nin ran vâi inthâihei nin ilanhei hi ki chang a dong tâk; serâtchal hei, bera hei, kêlchal hei thisenah hin lômna nei viat mang e.

¹²Ki maah rilan ranga nin hongah hin tûm hi thilhei hih hong ichôi ranga nangni ti? Ki Tempil tolâi hong isirpol rangin tûm nangni phût a?

¹³Thillan hong chôi kikêng khâi no rei, îte rifena omak e; namhoi nin ihâl khom hih ki îtir a nit; thla thar kût hei, sabat hei neh sakhua inkhômpui roinpuia ribûm hei khom hih changdong iom tak a nit, nin sualna sikin thonchâinan ai sip a nit.

¹⁴Nin thla thar kûthei neh zoro bîk inei kûthei chu ki lungrilin ai nel a nit; ki ta rangin puak irik tak a nit a; â tuang ki chang a dong tâk.

¹⁵“Khaangkan ne ngêna ki tiang nin kut nin phar tikin khom ki mit nangni sîng pêk tâng ki ti; nin kuthei khah thisen ikop a nit sikin vêl itam takkah ṭongṭai khom unla, nangni ringai pêk no ning e.

¹⁶Tui risil unla, mahni risûn fâi rei. Nin thilisual tho kî mu ngai hih mah unla, sual isin hih ima ta rei.

¹⁷Thil iṭha sin risei unla, â dik chu rizûl rei. Nuamlo tuanghei ṭangpui unla, farahei roi idik takkan rêl pêk unla, numeihei thu thlopin idingpui rei,” ai ti a nit.

¹⁸PUMAPA khan, “Tho ta u, lei ringaitua thlâng rei u! Nin sualhei chu sen inlâr angkan om ta khom sela, ivur angkan vâr a ti; senduk angkan om ta khom sela, bera mul angkan ṭek a ti.

¹⁹Ki thu bang nin zôm mai rang tâkin chu nin rama thil iṭhahei fâng nin ti;

²⁰nikhomsela, nin nuam no a, nin rihelin chu khandaiin nangni fah zoi a ti; keimah PUMAPA ngêiin ki îsîr a nit,” a ti a.

²¹Îtho sika khopui iamom tak khah nochizuar angkah ai nit tâk mani? Idik taka roirêlna, mi felhei omna ngai khah atûn chu mithattuhei omna a hong init tâk hi!

²²Nangmah Jerusalem, tangkarua ni nit ngai a, atûn chu a êkisia ni chang tâk a; uain iṭha angkah ni nit ngai a, atûn chu tui khotlong bang ni nit tâk.

²³Ni milianhei chu rihel irât, inruhei mal an nit a; fâkinrûk inuam a, thamna rizûl ngai an nit. Farahei idik takkan roirêl pêk ngai mak a, numeihei thu lakin an ziang tlung phâk ngai mak.

²⁴Khasikin, Tinrêngthothei PUMAPA, Israel Pathian irât a khan, “Ne doituhei chungah ki ningmur iṭhum ki ta, ke râlhei chungah phuba lâng ki ti.

²⁵Khante, ni chungah ki kut iṭhum ki ta, tangkarua angkan nang hâl infâi ki ta, a êkisia chu hâl ifâi vang ki ti. Ni porinchena murdi inboi vang ki ti.

²⁶Khante, tianlâia ni sunga roirêltuhei neh roisaktuhei angkana mihei kha nang peh nôk ki ta; khanchu, Jerusalem chu khopui iamom neh khopui ifel nang ti tâng an ti,” ai ti a nit.

²⁷PUMAPA chu â dik sikin Zion chu diknaa sanisua nîng a ta, a sunga om an sual rilethei khom felnaa sanisua ni tâng an ti.

²⁸Nikhomsela, a chunga riheltuhei neh mi sualhei kha chu itônrinôi a ta; PUMAPA maraktuhei chu inrimangin om an ti.

²⁹Saso thing ibia nî nuam ngai kha izak tâng ni ta, rikul iser nî siamhei khah ni îzakpui rang tâk a nit.

³⁰Saso thing ithi rang tâk angkan thêm nin ta, tui mu no rikul angkan nin ichâr mai rang a nit.

³¹Khante, meirisîn ipon ai kâng zel ngai angkah hin mi rât ihâi takhei khom an sintho sualhei khan kâng inrimang a ti; amakhah tutên that dip thei no nih.