Read Biete ISAIA 10 Bible Online

ISAIA 10 - Biete bible

ISAIA 10

¹Dân dikino takhei isiam a, thupêk ikhir tak tak isua ngaihei o; nin chung ân khôk e.

²Khangkah khan inrianghei ṭhat ualna rang nin idan pêk ngit a, idik takkan roirêl pêk ngai mak chei a. Khangkah khan a nit, numeihei neh farahei neinun nin îrok ngai chu a nit.

³Pathianin kuttum nangni a tho tikin im nin tho rang? Ram ilah taka rithoka siatna a hong tlung tikin im nin tho rang tâk? Tu ziangâm ṭangpuina zongin nin itlân rang? Nin richonhei taktiang tak im thup tâng nin ti?

⁴Suaka an imanhei lâiah ṭang sâng nin ta, a nit nole an ithathei lâiah ṭang sâng nin ti. Khaten khomin PUMAPA ningthik la ṭuai ual mak a, kuttum itho rangin a kut a la îlek mai a nit.

⁵PUMAPA khan, “Asuria rêng chu ki ningmur tôkmol a nit a, ki ningthik iṭhumna ranga ke rol a nit.

⁶Pathian ngaisak ino nam idoi rangin ki tir a, ki ninginthiktuhei inuai bit rangin thu ki pêk a. Anni chu mihei va rûn a, va rok rang neh kotsua dialdôk angkana isirpol rangin kî tir a nit,” a ti a.

⁷Nikhomsela, Asuria rêng khan amakhah chu ai tum ni mak a, ama angkana tho kha chu a lungrila a nuam dân ni mak a. Ai tum tak chu nam danghei kha inrimang a, rup tôk om tlak loia that inrimang riai a nit.

⁸A lungrilin, “Ki milianhei hi rêng itluk korong an nit a,

⁹Karkhemis khua neh Kalne khua khom ki înê tâk a nit a, Hamath khua neh Arpad khua khom ke nê tâk a, Samaria khua neh Damaska khua khom ki înê tâk a nit.

¹⁰Mirmil chubai iûn ngai ramah ki kut ke lek a, Samaria khua neh Jerusalem khua nêka mirmil tamna ramhei chungah ki kut ki îlek tâk a nit.

¹¹Samaria khua neh a mirmilhei ki îsiat vang angkan Jerusalem khua neh chubai an iûn ngai an mirmilhei khom ki îsiat vang rang a nit,” a ti a.

¹²Khannisela, PUMAPA khan, “Zion tlâng neh Jerusalem khua chunga thil itho kî tum khah ki tho zoi tenan chu Asuria rêng kha arpâkna neh arsongna tinrêng sikin kuttum kî tho rang a nit,” a ti a.

¹³Asuria rêng khan, “Ki rât sik neh ki vâr, ki thiamna sikin keimah ngêiin kî tho riai a nit. Nam tin ramrî kha ki thîn a, an richon bûmhei kha ki sut a, sechal ihâi angkan an rênghei chu kî chîl neng a.

¹⁴Iva ribua iva ritui iol tengka ila ai nit ngai angkah hin, rammuala ram tinhei chu ifen an ribu zôl kha ke mai pêk nek a, an richonhei kha ki lâk pêk riai a, ne ṭhina ranga an rithla thing ngam zel omak a, ne lei rikôk ngam khom tute zel omak e,” a ti a.

¹⁵Nikhomsela, PUMAPA khan, “Reipui hin â lektu nêka roinpui ualin a irbe thei mani? Thing-âtna (âri) khom hih â âttu nêkan ai poimo ual mani? Tôkmolin miriam lâng mak a, miriamin kêng tôkmol kha ai lâng a nit,” a ti a.

¹⁶PUMAPA Tinrêngthothei ngei khan mi takmut muthei ikông rî inrivoi a ta, mei ikâng angkan an takpum lum vung vung a ti.

¹⁷Israelhei invârtu, Pathian chu mei chang a ta, Israel Pathian rithiang khah meichok chang a ta, sûnka sungin tinrêng kâng riai a ta, rilingkunghei neh ibuarhei ten khom kâng infâi vang a ti.

¹⁸Rampuihei neh ram iṭhahei lutna kha iseh vang a ta, natna rî inrît thina thlun ngêt angkah hin inrimang a ti.

¹⁹Rama thing la ding phir pharhei chu naipang tep inrup bak bang nîng a ti.

²⁰Kha zoroah khan chu Israel la dam isunhei neh Jakoba richi â thi bân la omhei khan anmani nuamilotuhei chungah ringat khâi no ni a, PUMAPA, Israel Pathian Rithianga chungah ringat ngit tang an ti.

²¹Jakoba richi â thi bân la om isunhei chu an Pathian irât tak ziangah hong kîr nôk an ti.

²²Israel mihei chu tuikhanglian rikama ṭiai dôran tam man sela, iroichekah bang hong kîr nôk an ti; rimang rip ranga inkung an nit a, an mu tum pial chu an imu tâk a nit.

²³Tinrêngthothei PUMAPA Pathian khan a înkung tâk angkan ram pumpuiah siatna a îthlun rang a nit.

²⁴Tinrêngthothei PUMAPA Pathian khan, “Ziona om, ki mihei o, Aigupta mihei itho angkan Asuria khan irol ilekin nangni to ngai khom sela, ṭi no rei.

²⁵Sôt inote sungin nin chunga ki ningmur chu dâi a ta; khanungchu, an chungah ai ṭuang rang tâk a nit.

²⁶Keimah, Tinrêngthothei PUMAPA khan Oreb Lungpui muna Midian mihei chunga kî tho angkan an chungah khom tôkmol ilek ki ta, Aigupta mihei kuttum ki tho dân angkan Asuria kha kuttum thông ki ti.

²⁷Kha nikhuaah khan chu Asuria thunuaia nin îkhûn khah nangni sua tâng ki ta, nin ring ata a ringkol chu ikhiak tâng ki ti,” a ti a.

²⁸Ai khua an hong tlung tâk a, Migron khua an hong pâl thleng a, Mikmas khuaah an fâknêk an siabûm tâk a.

²⁹Pialikot an khêl a, Geba khuaah an riak a; Rama khua mihei chu iṭin an inthing a, rêng Saula khua Geba mihei chu lâizâm an tho tâk a.

³⁰Galim kho mihei o, iṭin ikhêk unla, Laisa kho mihei o, ringai unla, Anathot mihei o, sâmna peh rei.

³¹Madmena kho mihei neh Gebim kho mihei chu ribi rangin lâizâm an tho a.

³²Vuansûnah hin irâlhei chu Nob khuaah an om tâk a, kha munah khan Zion tlâng, Jerusalem khua chu an kuttum an inmu tâk a.

³³Ringai ta, PUMAPA, Tinrêngthothei PUMAPA khan thing iṭang ri-om angkan anni chu ri-om iṭhul pai a ta, risâng taka oma risong khaphei khah ri-om a ta, intlôm a ti.

³⁴Reipuia rampui thing an îphûr ngai, Lebanon tlânga thing ilian tak tak khom an îphûr inlîr ngai angkah hin PUMAPA khan Asuria chu iphûr inlîr riai a ti.